Lilongwe, Jylliew 11: Ka khubor kaba sngewsih kaba la saphriang ha kylleng ka ri Malawi kaba don hapoh ka South Eastern Africa, hadien ka jingkhlad kaba kyndit noh jong u Vice President ka Malawi u Saulos Chilima u ba la khlad noh hadien ka jingbthei ka liengsuin kaba u shong ha ryngkat kiwei pat ki 9 ngut ki nongleit nongwan.
Ia kane ka jingjia, la pyntikna da u President jong kane ka ri u Lazarus Chakwera, u ba la iathuh ba ka jingbthei ka liengsuin kaba la shong da u Chilima ka la jia ha ka sngi Ba-ar jong kane ka taiew.
Ka tyllong khubor ka la iathuh ruh, ba ka liengsuin kaba la shong da u Chilima ka la jah lynti bad duh noh ka jingiakren hadien ba kam shem la lah ban hiar hapoh ka Mzuzu International Airport, kata hadien ba ka la her kumba 380 Miles naka sorbah Lilongwe.
La iathuh ruh, ba la lah ban pyntikna ba la lap ia ki lyngkhot lyngkhai jong kane ka liengsuin.
“Ka jingpyrshang ban leit wad ne iarap ia kiba la shong ha katei ka liengsuin kaba la bthei ka la sdang bad la bthah ruh ban wad bniah ia kane ka aeroplane kaba la jah bad la lah pat ruh ban pyntikna ia ka jaka ba kane ka aeroplane ka la hap” ong u Chakwera da kaba phah ruh ia ka khubor kaba sngewsih sha ka ri hi baroh kawei bad ka jingsngewlem sha ki bahaiing hasem bad ki baieid bathoin jong u Vice President ka Malawi, u Saulos Chilima.
