Nongpoh, Jylliew 11:
Ka kynhun Special Team bad Executive Force jong ka Ri Bhoi District ha ka 10 tarik jong u bnai Jylliew, 2024 ki la ioh ban pynjem khnap noh ia ka Sleeper Cell jong ka seng kieng atiar Hynniewtrep National Liberation Council (HNLC) kaba donkti ban dawa pisa na ki paidbah bad kaba treikam ha ki thain Umroi, Mawhati bad ka nongbah Shillong.
Ia kane, la pyntip da u Superintendent of Police ka Ri Bhoi District, u Jagpal Singh Dhanoa, uba la pyntip ruh ba kine ki lai ngut kiba ki bor pulit ki la ioh kem ha katei ka jingleit khynra kaba kyrpang ha katei ka sngi kidei kiba la tip kyrteng kum u Bah Cyfrank Paul Pariat, 25 snem ka rta na ka shnong Ummat, Ri Bhoi District uba dei u Self-style Commander jong ka seng HNLC, u Bah Kitbok Mujai, 23 snem ka rta na ka shnong Ummat bad u Bah Barnabas Lyngdoh, 49 snem ka rta na ka shnong Khyndewso, Ri Bhoi District.
U Jagpal Singh Dhanoa u la pyntip ruh ba kitei kiba la ioh kem da ki pulit kidei ba la leit ban shah hikai pyntbit sha ka ri Bangladesh ha u snem uba lah dep bad kiba donkti ruh ban bei tyngka, ban pynrung kam pynsaphriang ia ki khubor lamler ban kyntiew ia ka jingthmu jong ka seng kaba la shah khang pyrshah hapoh ka kyndon Unlawful Activities (Prevention) Act (UAPA).
Utei u heh pulit, u la iathuh ruh ba ia kitei baroh lai ngut ka register case ha Umiam Police Station katkum ka case no. 46(06)2024 jongki kyndon 120B/306 jong ka Indian Penal Code (IPC) ryngkat bad ki kyndon 10/13/17/18 jong ka Unlawful Activities (Prevention) Act (UAPA) bad pyntip ruh ba ki bor pulit ki la ioh por kumba 10 sngi na ka Ingbishar ka Ri Bhoi ban pynlong iaka jingtohkit kaba bniah pyrshah ia kitei ki lai ngut bad ban lapdien shuh shuh ia kiwei de kiba donkti.
Shuh shuh utei u heh pulit ka Ri Bhoi u buh ruh ka jingkyntu ia ki paidbah kiba la shah dawa pisa beain ha ka kyrteng jong ka HNLC ba kimdei satia ban ngop, hynrei ba kidei ban pyntip mar mar sha ki bor pulit khnang ba yn lah ban tehlakam ia kum kine ki kam beain.
