Shillong, Naitung 23: Ban pynsngewthuh paidbah halor ki jingma jong ka plastic khamtam ban wanrah ia ka jingkhuid jingsuba ha ki shnong ki thaw, mynta ka sngi ki bor ka Meghalaya State Pollution Control Board (MSPCB), ki bor ka tnat Enforcement na KHADC bad ki dkhot jong ki Dorbar Shnong ki la hiar ban ai jinghikai bad ban jurip ia ki dukan kiba don ha shilynter jong ka thaiñ Mawlai.
Lyngba kane ka jinghiar ban jurip bad ban pynsngewthuh paidbah halor ka jingpyndonkam ia ka plastic kaba lah ban ktah ia ka mariang, la bthah ia ki trai dukan ban pyndonkam da ki kynja plastic ba la ioh jingbit na ka Food Safety & Standards Authority of India (FSSAI).
Ha kane ka jinghiar jurip, da ki bor ka MSPCB, ki bor ka Enforcement la jurip ia ki dukan kiba don ha shilynter u surok na Mawlai Standbus sha Mawlai Mawroh.
U Bah Churchill Syiemlieh, Rangbah Dong ka Mawlai Phudmuri, u la pynpaw ia ka jingkmen halor ka jingshimkhia jong ki bor ba dei peit jong ka MSPCB bad ka KHADC kiba la shimkhia ban wan pynsngewthuh halor ka jingma jong ka plastic bad ruh ban mana ia ka jingpyndonkam ia ka plastic haba die jingdie.
U la pynpaw ruh, ba na ka liang ka Dorbar Shnong ka ai jingkyrshan halor kane ka mat bad ka rai ban khang noh ia ka jingpyndonkam ia ka plastic ba la rim ban iada ia ka mei mariang bad ruh na bynta ka jingkhuid jingsuba hapoh ki Shnong ki thaw.
