Nongpoh, Naitung 25: Wat hadpeng ka jingshit kyrang ka sngi bad ka jingkhluid kaba tar tar ba bun ki nongleit nongwan ha sor Nongpoh ki wad ia ka jaka riehtngen ha ki jaka badum sngi bad kaei kaba hap ban ai jingiaroh ka long ia ki Pulit Traffic ki pyndep la ki kamram wat hapdeng ka jingtuid ka syer na ka jingshit ka sngi tang ban iaid beit ki Kali paidbah kiba leit ba wan lyngba kane ka surokbah ha Ri Bhoi District.
Ia kane la sakhi ba ka jingshit ka bor mariang ka la poi palat ban ia ka 35°C ha kaba kiba bun ki riew paidbah ki la ud la nam ba la jut ka jingshit, hynrei ha kum kane ka por ki Pulit Traffic na Nongpoh khlem salia ki hap ban pyndep ia la ka kamram ba la bynshet tang ban iaid beit ki kali paidbah lyngba kane ka surok National Hghway-6 ha Ri Bhoi District.
Haba sakhi halor kine ki kam shakri paidbah ki Pulit Traffic, kiba bun ki riew paidbah ki ai ka jingiaroh ba ki pyndep hok ia la kamram ba la bynshet da ka tnad Pulit bad kane ka paw ba ki long hok ha la kam ba ki la bam tulop na ka sorkar.
Haba kren halor ka jingtrei hok ia la ka kam, lah ban ong ba bun lehse kim lah ban sngewthuh ia ka jingshitom kiwei, hynrei kine ki Pulit Traffic khlem salia hapdeng ka jingshit kyrang ka suinbneng ki pyndep ia la ka kamram wat hapdeng ka jingsyep ka met ha ki Uniform, ba kum ki riew paidbah ki hap ban ai ia ka jingiaroh bad kaba long ruh ka nuksa ba bha na ka bynta kiwei ba kin pyndep hok oa ka kamram la ha ki kam sorkar ne ha kino kino ki kam.
