Shillong, Naitung 25: Halor ki mat ki jura kiba donkam eh ha ka jylla bad kumjuh ruh halor ki jingdonkam ki paidbah hapoh ka jylla, U Dr. Ricky A.J Syngkon kum u MP ka jylla na ka Shillong Parliamentary Constituency mynta ka sngi u la ioh lad ban ia kynduh ia u Myntri ka tnad pohïing ka sorkar pdeng u Amit shah ha kaba u la aiti ruh ia ka dorkhas ban ia kren halor ki mat ba ka sorkar pdeng ka hap ban phai khmat kyrpang sha ka jylla Meghalaya.
Ha kane ka jingleit kynduh ia u Myntri ka tnad ka kam pohïing ka sorkar pdeng, u Dr. Ricky A.J Syngkon u la rah haduh 6 tylli ki mat ki jura kiba dei katkum ka jingdonkam ki paidbah hapoh ka jylla.
Kitei ki 6 tylli ki mat ba pynssngew sha u Myntri ka tnad ka kam pohïing ka sorkar pdeng ki kynthup ban pyntreikam noh ia ka Inner Line Permit (ILP) hapoh ka jylla, ban pynrung noh ia ka ktien Khasi sha ka thup jong ka Eight Schedule, ban pynheh ne pyntreikam janai ia ka Umroi Airport, ban kyntiew kyrdan ia ka NEIGRIHMS sha ka kyrdan Institute of National Importance (INI), ban kyntiew kyrdan ia ka Indian Institute of Tourism and Travel Management, Shillong Centre bad ban thaw lad ban ai kam ia ki trai jylla na Meghalaya ha ki tnad treikam ki shipai bapher bapher kiba don ha ka jylla Meghalaya.
Kitei ki dei ki mat ba u Dr. Ricky A.J Syngkon kum u MP ka jylla, u la ioh lad ban pynsngew ha ki tyndong shkor u Amit Shah, uba dei u Myntri ka tnad ka kam pohïing ka sorkar pdeng bad u la ioh lad ruh ban aiti ryngkat ka dorkhas ha ka jingkynduh mynta ka sngi ha Nongbah Delhi.
