Shillong, Naitung 26: Ka Shillong Lajong FC ka la pynbam haduh shiteng dorjon ne thep haduh 6-0 pyrshah ia ka Malaysian Armed Forces, ha ka jingiakhun ba nyngkong jong ka Group-E jong ka 134th Durand Cup, kaba la sdang mynta ka sngi ha Madan JN Stadium, Shillong.
Ia kitei ki 6 kol na bynta ka Shillong Lajong, u Phrangki bad u Everbright ki la ioh ban thep mar arkol, katba u Tremiki bad u Deibor ki la ioh ban thep mar shikol bad kaba la biang pura na bynta ka Shillong Lajong, ba kan khur ia ka namjop kaba nyngkong ha katei ka lympung ialehkai phutbol kaba la rim tam ha Dewbah Asia.
Ka jingiakhun ha katei ka sngi, ka long ba ha ka kylla step jong ka jingiakhun, ka Shillong Lajong, ka la ioh ban pynkhihjar nyngkong lyngba u Everbright, uba la ioh ban thep kol ha ka minit ba 12 bad kiba la pynkut ia ka kylla step da 1-0.
Haba bteng ka kylla miet jong ka jingiakhun, ki rangialehkai ka Shillong Lajong, ki la nion tyngeh pyrshah ia ki rangialehkai ka Malaysian Armed Forces bad dei ha katei ka rukom iakhun, ba ka Shillong Lajong la ioh biang ban pynkhih jar lyngba u Phrangki uba la thep ha ka minit ba 47 bad 49, bud biang sa ka kol na u Everbright ha ka minit ba 66, katba ia ki kol ba sah la thep da u Tremiki ha ka minit ba 73 bad u Deibor uba la thep ha ka minit ba 90+5.
Haba sdang jong ka 134th Durand Cup ha Nongbah Shillong, la sakhi da ka jingdon u Conrad K. Sangma, Myntri Rangbah ka sorkar jylla, nangta u Bah Shakliar Warjri, Myntri ki kam ialehkai ha ka jylla, ki heh shipai lem bad kiwei.
