Nongpoh, 25 Naitung: Ki la don kumba 150 ngut eiei ki samla kynthei bad shynrang na ki shnong bapher bapher jong ka thaiñ Byrnihat bad kiba la pyndep ia ka jingshah hikai kaba hynriew taiew kynthih, halor ki lain wadkam Sorkar, ha ki Bank bad ruh kumno ban iakhun ia ki eksam kiba kynthup CUET, CLAT lem bad kiwei, mynta ka sngi ki la ïoh ban pdiang ia ki Syrnot, kaba long kum ka jingpynshisha, ba ki la pyndep ia katei ka jingshah hikai.
Ia kitei ki Syrnot, la sam da u Bah Sosthenes Sohtun, MLA Jirang ha ryngkat ka jingdon u Bah Eric Dkhar, BDO Umling Block, u Bah Iaineh Wahlang, Rangbah Shnong Lum Nongthymmai lem bad kiwei, ha kaba ia katei ka prokram ban sam ia kitei ki Syrnot, la pynlong ha Iing Dorbar ka shnong Lum Nongthymmai, Byrnihat.
Kitei ki samla kiba la ïoh ban pdiang ia ki Syrnot, ki dei kiba la pyndep ia ka jingshah hikai halor ban wad ia ki kam Sorkar, ha ki Bank bad ban iakhun ia ka eksam CUET bad CLAT, ka Coaching Class ne ka jaka ai jinghikai ia ki samla, kaba la pynlong da ka ophis u Deputy Commissioner Ri Bhoi, ha ryngkat ka jingiatreilang u MLA Jirang bad kaba la kyrshan da ka “Chief Minister’s Career Guidance & Counselling Scheme”.
Ia kitei ki samla, la ai jinghikai da ka Triumphant Institute of Management Education (TIME) na Upland Road Laitumkhrah, Shillong, ha kaba ki la ai jinghikai la 6 Taiew man ka sngi kynthih bad kaba la phiah ha ki ar bynta, kata 2 kynta mynstep bad 2 kynta ha ka por janmiet.
Haba kren ha katei ka sngi, u Bah Sosthenes Sohtun, u la ong ba katei ka Coaching Class, kan long shisha ka ban ai jingmyntoi ia ki khun samla kynthei bad shynrang, namar lyngba ka jinghikai kaba ki la ïoh na katei ka Coaching Class, kan pynnep ia ka jingmut jingpyrkhat jong ki bad ba kin nang ba kumno ki wad ia ki kam sorkar, ha ki Bank bad khamtam eh ban iakhun ia ka Eksam CUET bad CLAT.
Kum u nongmihkhmat na Jirang, nga don ka jingangnud bad thrang eh ban wanrah ia kawei ka ‘Coaching Class’ ka ban neh junom ha Ri Bhoi, kata kaba kynthup naduh ka building ba paka, kumjuh ruh lem bad ki nongai jinghikai kiba biang, khnang ba kan long ka jingmyntoi ia ki paidbah ha Ri Bhoi hi baroh kawei.
