Nongpoh, Naitung 30: Ki khun ki hajar jong ka Hima Jirang, ki la khih win hi puk bad bitar tyngeh hadien ba ki la ïoh jingtip ba ka Shnat Hima Nongwah Mawtamur Sohiong Lyngdohship, ki la thmu ban wan kam ei ne klun ia ki jaka kiba hap ha Hima Jirang, kiba don ha ka thaiñ Rani Jirang kaba don shadien jong ka ADC camp ki Pulit ha Rani.
Ban pyrshah halor katei ka jingthmu klun jaka ka Shnat Hima Nongwah Mawtamur Sohiong Lyngdohship, na ka liang u Syiem ka Hima Jirang, ha ryngkat ki khun ki hajar, ki la thmu ban leit hiar paidbah sha ka jaka ba ki briew jong ka Shnat Hima Nongwah Mawtamur Sohiong Lyngdohship, ki la thmu ban plie ia ka ophis treikam kaba don ha shnong Rani Jirang.
Haba iadei bad katei ka jingthmu klun jaka ka Shnat Hima Nongwah Mawtamur Sohiong Lyngdohship ha Rani Jirang, da kaba plie ia ka ophis treikam ba pura, na ka liang ka ophis u Deputy Commissioner ka Ri Bhoi, u la pynjari da ka section 173 BNS ban khanglad iaki no no ki briew ban ialum ialang jaka juh ka jaka, khnang ban khanglad ia kino kino ki jingjia bad ki ban poi sha kaba mynsaw, ha kaba la ïohi ba ki bor Pulit na Ri Bhoi bad ki Bor Distrik, ki la poi sha katei ka jaka bad ban khang na ka jingialum paidbah.
Haba kren sha ki lad pathaikhubor u Paiem H. Wahlang, Syiem ka Hima Jirang, u la pynpaw ia ka jingsngew Lyngdoh kaba khraw halor katei ka jingthmu wan kam jaka jubor kaba kynsan kynsan da ka Shnat Hima Nongwah Mawtamur Sohiong Lyngdohship, da kaba ong ba katei ka jaka, ka dei kaba la peit la khmieh da ka Hima Jirang la da ki spah snem mynshwa.
