Nongpoh, Naitung 30: Ka jingrung u Bah Ronie V. Lyngdoh sha ka Party NPP ka la pynlyngngoh ia kiba bun ki paidbah hapoh ka jylla bad khlem poi pyrkhat une u MLA ka Congress bad u heh Nongialam ka Congress u la pyniasoh noh ia lade sha ka party NPP ha kaba mynta ka party Congress ha ka jylla kam don shuh wat tang uwei ruh u MLA.
Kumba la paw, u Bah Ronie V. Lyngdoh MLA ka Congress u la rung mynta sha ka party NPP ha Nongbah Shillong, hakaba la pdiang burom ia u da u Thomas A. Sangma, u nongialam ka NPP bad uba dei ruh u Speaker ka State Legislative Assembly.
La sakhi lang ruh ha kane ka sngi da ka jingdon lang u symbut Myntri rangbah ka jylla, u Bah Sniawbhalang Dhar, u Bah Hamlet Dohling, u working President ka State NPP, u Treasurer ka NPP u Bah Daniel Thangkhiew lem bad kiwei kiwei ki heh nongialam ka party NPP.
Kumba long haduh mynta, kane ka jingrung noh u Bah Ronie V. Lyngdoh, MLA ka Congress sha ka NPP lah ban ong ba ka la pynlyngngoh ia kiba ki paidbah ha ka jylla bad kane ka jingrung jong u sha ka sem NPP ka lah ban ktah jur ruh ia ka party Congress ha ka election MLA ban sa long ha u snem 2028 kaba dang don por mynta sa lai snem kynthih.
