Nongpoh, Naitung 30: Namar ba la saphriang ka jingthoh u Vice chancellor ka USTM u Mahbabul Hogue ha ki rynsan social Media halor kata ka ‘Mission Educational Rehabilitation’ , u Chancellor ka skulbah USTM mynta ka sngi u la pynshai paidbah lyngba ki lad pathai khubor halor katei ka thong kaba u la pynpaw ha ki rynsan social Media.
Haba kren sha ki nongthoh Thoh khubor, u Chancellor ka USTM u Mahbabul Hogue, ba halor katei ka jingthoh jongu , bun kiba la pyrshang ban ialam bakla ia ki paidbah khamtam ba ka skulbah USTM ka dei kaba la shah kynthoh na ka por sha ka por ha ki briew kiba la heh kyrdan na ka jylla Assam kaba dei halor ka jingkiew shaphrang kane ka skulbah.
U la pynpaw ruh da kaba ong, ba katei ka jingthoh kaba u la buh ha ka rynsan social media ka dei ha ka por ba u dang shong liengsuin, ba ka jingthmu ka long ban kdup tang ia kito ki khynnah kiba la shah ktah jur na ka jingshah kyndang ha ka sorkar Assam bad baroh kiba shah kyndang ruh kim dei satia kiba na Bangladesh bad ban iarap lem ia kito ki khynnah kiba la shah ktah ka USTM ka thmu ban iarap ban ai jingpule ym ha ka jylla Meghalaya hynrei ha ka skulbah jongka kaba don ha ka jylla Assam.
U la pynshai ruh da kaba ong, ba kane ka jingthmu kam dei satia kaba shu leh khlem da bishar bniah bad haba thmu ban kdup ia kito ki khynnah kiba shah ktah ki hap ban bishar lyngba ki kot ki sla bad ka jingkynnoh pat ba ka USTM kan kdup sha kane ka skulbah kaba don ha Meghalaya ka long kaba bakla bad kaba la shah ialam ba kla ha kiwei kiba kwah ban pynthohbria ia ka skulbah USTM.
Shuh shuh, u la bynrap ruh da kaba ong ba ki paidbah ki tip ba mynta ba ka sorkar Assam ka don ha ka thma ban kyndang naphang ia ki Nong Bangladesh kiba wan sah beain ha ka jylla Assam bad don ruh kiba la duh ia ki ing ki sem, hynrei ka thong jong ka Mission Educational Rehabilitation ka long ban iaid katkum ki lynti lyngba ka jingbishar bniah ia ki kot ki sla ban ai jingpule ha Assam namar bun kito kiba ym dei na Bangladesh ruh ki la shah ktah jur ha kane ka jingkyndang ka sorkar Assam ia kiba wan shong beain ha ka jylla Assam, u la bynrap.
