Nongpoh, Naitung 30: Ka Khasi Student Union, North Khasi Hills District Unit, ha ka jingialam u President u Samla Ferdinald Kharkamni bad u General Secretary u Samla James Mawphniang lem bad ki dkhot mynta k sngi ki la leit ban ia kynduh ia u Chancellor ka USTM u Mababul Hogue, ban ia kren ne ia thir sani halor shibun ki mat ba ka seng ka la ju iatrei lang na ka bynta ka bha ka miat jong ki samla pule ka jylla bad khamtam mynta u snem bun ki samla kiba pass bha bad ki duna pat ha ka liang ka ioh ka kot.
Ka seng ha kane ka sngi, ka la ioh ban ia kren halor shibun ki mat ki jura na ka bynta ka jingmyntoi ki samla pule ha ka jylla bad ha ka jingiakren sani bad u Chancellor haduh 12 ngut ki samla pule ha ka Under Graduate ba lyngba ka jingiakren ka seng kin ioh ia ka jingpule ei kaba kim donkam ban siew na ka daw ba ki wan na ki longïing longsem ki baduk ba kyrduh.
Haba kren sha ki lad pathai khubor, u Samla Ferdinald Kharkamni, u la ong ba kane ka jingpynrung skul ia ki samla ba wan na ki longing baduk ka la sdang naduh u snem 2029 bad kum ka seng ka la shim khia halor kane ka bynta ka dei namar ba bun ki samla pule Khasi ki la kiew ha ka pule ka puthi bad ha ka kyrdan jingpule bad ka long pat ka khubor kaba sngewkmen ba haduh 12 ngut ki samla ha ka undergraduate ki la shah jied ban ioh pule ei ha katei ka skulbah khlem da donkam ban siew.
Shuh shuh, u bynrap ruh da kaba ong, ba nalor ki 12 ngut ki samla pule kiba la ioh ban pule ei ha katei ka skulbah ha ka kyrdan UG, ka seng ka la shim khia ruh ban ia kren na ka bynta kito ki samla pule ha ka Post Graduate kiba dei kiba wan na ka longïing baduk bad ruh ba ka seng ka la ia kren ruh na ka bynta kito kis amla pule ka jylla kiba wah ban pule MBBS, u la bynrap.
