Nongpoh, Naitung 31: Uwei u samla uba dei ruh u nonghikai skul, u la shah kem bad shah bom jem ha ki bor pahara jong ka tnad Forest ka jylla Assam, khlem da don kano kano ka daw kaba shai kaba la wanrah ruh ka jingmynsaw bad jngem snam haki bynta ka kti bad ka met.
Utei u samla u la tip kyrteng kum u Noreshor Timung, 28 snem ka rta, u ba shong ba sah ha ka shnong Garo Banga (Amreng), kaba hap ha ka thaiñ khappud Assam bad Meghalaya, hapoh ka Jirang Constituency, Ri-Bhoi District.
Katkum ka jingtip bala iohlum, ki bor pahara jong ka tnad Forest Assam kila kem ïa utei u samla ha ka por janmiet, kumba ha ka por 2 haduh 3 baje nohphai sngi, na shnong Umshalani khlem da pynshai ïa ka daw, hynrei ki bor pahara kila thep beit ïa u ha ka kali bad bom jem dusmon ïa u, bad rah ia u sha Lokhra.
La sakhi ruh da ki paidbah bad ki bahaiing hasem, kiba la bud mar mar bad leit ban dawa ïa ka jingpynlait noh ïa utei u samla. Ki paidbah kila kynnoh ruh ba ha katei ka jingjia, wat ki briew paidbah ruh kila shah ktah kti ha ki pulit bad ki shipai pahara jong ka tnad Forest Assam.
Hadien ka jingshah kem utei u samla naka liang u MLA ka Jirang Constituency, u Bah Sosthenes Sohtun, u la shimkhia mardor bad iakren bad u DC bad SP ka Ri-Bhoi District, ban ia kren ia ki bor jong ka district jong ka Assam bad naka jingtuklar jong u MLA, ka tnad Forest Assam kala pynlait noh ïa u Noreshor Timung hynnin ka miet hi, hapdeng ka jingmynsaw kaba jur.
