Nongpoh, Nailar 04: Kum kawei kaba phai khmat kyrpang ia ki paidbah ka Ri Bhoi District, ka seng Ri Bhoi Peoples’ Council (RBPC), mynta ka sngi ka la mih shakhmat ban pynpaw ia ka jingpyrshah kaba jur bad ia ka jingplie ia ka Pine Club ha Queen’s Hotel kaba don ha Jorobat da kaba kynnoh ba ki khlem iaid ki lynti kiba dei bad la shu plie tang da ka daw ba don kita kita ki nongkyrshan baheh bahain jong ka sokar.
Haba kren sha ki lad pathai khubor, u President ka RBPC, u Samla Jayson Lennox Nongrum u la ong ba kum ka seng ka dap da ka jingsngewlyngngoh kaba khraw ha kaba tang hadien shi sngi ba u MLA ka Jirang u Bah Sosthenes Sohtun u la kren sha ki lad pathai khubor ban phah tohkit ia ka jingdon ka Night Club bad ki kam khalai beain, hynrei tang ha ka sngi kaba bud la wan plie syndon da u Actor ba pawnam ka Bollywood u Govinda ha kaba la don lang ruh wat u myntri sorkar barim ka jylla bad u Chairman ka MIDC u James K. Sangma.
U la ong ruh ba kum ki bor District bad u MLA ki dei ban don jingtip haba pyniaid kum kitei ki jaid kam, hynrei kaba sngewlyngngoh ba wat u MLA ruh um don jingtip satia bad ka long ka jingkyndit ba tang hadien shi sngi ba la pynlait khubor da u MLA la plie paidbah ia katei ka Pine Club ha kaba ka seng ka la wad jingtip ba kam don kano kano ka jingpyntip sha ki bor District bad wat sha u SP ka Ri Bhoi.
“ Ka seng ka la wad jingtip ruh wat na ki bor shnong ka Mawsmai ha kaba ka shnong ka la pynshia ba ba la ai NOC la kumba 5 bnai tang ban pyniaid ia kito ki Indoor Game bad ym ia ka khalai ne ka Night Club” ong u Samla Nongrum, bad bynrap ruh kumba long mynta la paw shai ba ka jingai NOC kam iahap satia bad ka kam kaba ki la pan jingbit ban leh ha katei ka Hotel” u la bynrap.
Halor kane ka kam, ka seng kan sa leit ruh ban ia kynduh ia u Deputy Commissioner ka Ri Bhoi ban pan jingshai bad ruh kum ka seng ka pyrshah jur ban don kane ka Pine Club kaba la pyniaid khlem da iaid katkum ka lynti jong ka ain.
Shuh shuh, na ka liang ka seng ka la kyntu jur ruh ia ka Dorbar Shnong ba ka dei ban weng mador ia katei ka NOC bad ka seng ka dawa ruh na ka bor synshar District ba kim dei ban ailad ia kitei ki kam beain bad ban pynlong da ka jingtoh kit kaba bniah, u la bynrap.
