Shillong, Nailar 04: Khlem da don shuh ka mynsiem sngew synei wat ia la ka kurim la jong ne sngew para briew, uwei u runar ba la tip kyrteng kum u Bahkmen Phthmi u la pom da ka wait tukri ia la ka kurim haduhba ka kti kadiang ka la dkut bad ka la mynsaw jur.
Kane ka longkmie ba la shah pom da ka wait tukri hala jong u kurim ka dei ka Kong Inmon Sumer na ka shnong Krangpangtadong ba hap ha Amlarem Civil Sub Division West Jaintia Hills.
Kane ka jingjia ka la jia ha ka 2 tarik u Nailar ha ka por 2 baje janmiet,ha kaba utei u runar wat ia la ka kurim u la pom da ka wait tukri haduh ba la dkut ka kti kadiang bad u khun jongka ruh uba pyrshang ban iarap ia la ka kmie u la mynsaw ha katei ka jingjia.
Kumba la pynpaw ha ka ejehar ba la ujor sha ki pulit, la ong ba utei u kpa runar u la rah da ka wait tukri bad rung sha ka kamra shet ja ha kaba ka Kong Inmon Sumer bad u khun u wanmi Sumer ki dang ia bam ja. U khun ha ka jingiada ia la ka kmie u la mynsaw na ki bynta ka durkhmat ba sha kadiang.
Ia kane kane ka Longkmie ba la mynsaw la rah noh mardor sha Woodland Hospital Jowai, ha kaba mynta ka dang don hapeng ka jingsumar.
Kumba la pyntip da u he pulit ka West Jaintia Hills, la ong ba ia utei u runar la ioh ba kem da ki pulit bad ka jingtohkit pyrshah ia une u runar ka dang iaid shakhmat ban leh katkum ki kyndon jong ka ain.
