Ki dkhot jong ka seng ka HYC Sumer Unit, ki la leit ban khynra kot ia ki nongtrei bar jylla, kiba trei bylla ha surok Shillong Western By-pass bad ha katei ka jingleit khynra, la lap ba bun na kitei ki nongtrei bar jylla, kim don ia ki kot ki sla kiba biang bad nalorkata, ka seng ka la lap ruh ba don na ki bar jylla kiba trei ha katei ka surok, ki dei kiba dang hapoh ka 18 snem bad ba kim pat don wat tang ia ka dur Epic.
Ha katei ka sngi, ba ki dkhot ka HYC Sumer Unit, ki la leit ban khynra kot ia ki nongtrei bar jylla kiba trei ia ka jingkieng kaba dang shna ha surok Shillong Western By-pass kaba don ha shnong 4-Number, la ialam da u Bah Shiningstar War, President Umbang Sumer Unit, ha ryngkat ka jingdon kiwei pat ki nongialam ka HYC, kiba kynthup ia u Bah Sainkupar Kharjana, u Bah B. Khongdup lem bad kiwei.
Haba kren sha ki lad pathaikhubor, u Bah Shiningstar War, u la ong ba ka daw kaba la pynlong ia ki nongialam ka seng, ba kin leit jurip sha katei ka jaka, ka dei hadien ba ki la ioh jingtip ba la don ki bar jylla, kiba la wan trei bylla ha katei ka shnong, hynrei haba ki nongialam ka seng ki leit khynra ia ki kot ki sla, la lap ba kim don ia ki kot ki sla, kiba kynthup ia ka Labour License.
“Kum ka seng ka kwah ba katei ka surok kan dep kloi noh, khnang ba kan long ka ban ai jingmyntoi ia ki paidbah ha ki shnong bapher bapher jong katei ka thain, hynrei da pyntrei pat da ki bar jylla, kiba khlem da pynbiang ia ki kot ki sla, kum ka seng hi kam lah ban pdiang bad kan pyrshah beit, da kaba khynra naphang ia ki” ong u Bah Shiningstar War.
Namarkata, kumba ngi la sdang ia kane ka jingkhynra ia ki kot ki sla ia ki bar jylla, nangne shakhmat ngin dang bteng biang ban khynra sa sha kiwei pat ki bynta ha katei ka surok, namar ki don shibun ki bar jylla bym ithuh ithaw, ki la wan ban long kum ki nongtrei bylla ha katei ka surok bad lada ngi lap ba kim biang ia ki kot ki sla, ngin beh naphang ia ki, la pynpaw kitei ki nongïalam.
