Ka KSU Umiam Circle hapoh ka jingïalam jong u President Bashem Kharnaior, ryngkat bad u Asst. Organising Secretary Banshan Nongbsap, Education Secretary Battilang Nongbri, hynne ka step haka por 6 baje kala ioh jingtip ba ki don shi kali ki mynder kiba wan na kawei ka kali kaba don ïa u number AS 25 CC 4375, bad la suba ruh ba ïa kitei ki briew la ïalam da uwei u briew u ba kam ïalade kum u pulit u ba pyni ruh ïaka ID pulit bad u bala tip kyrteng kum u Brill Rongpeit jong ka 1st Battalion.
Haka jingtohkit ka KSU kala lap ruh ba utei u pulit u la shim pisa mar 1 hajar na 5 ngut ki bar jylla kiba shong ha katei ka kali kum ka bai rung sha ka jylla, hynrei hadien ba ki nongïalam ka seng kila phah pyni ïaki kot ki sla ban pynshisha ïa katei ka jinglum pisa u tei u pulit lem bad kitei ki bar jylla kila phet krad noh na katei ka jaka khlem ai jingpynshai eiei sha ki nongïalam ka seng.
Ka jingphet kynsan jong utei u pulit lem bad kitei ki bar jylla kala nang pynsuba sniew shuh shuh bad naka liang ka KSU Umiam Circle kala pyntip mar mar sha ki nongïalam ka Mawlai Circle ban buddien bad ban lapdien ïa katei ka kali.
Ka KSU ka dawa mardor na ka tnad pulit jong ka Meghalaya ba ka dei ban pynshai la utei u Brill Rongpeit u dei shisha u pulit uba don ha ka kam bad u ba la pyndonkam bakla ïa ka kyrdan ne ka kam jong u, ne la u dei tang u briew uba kam ïalade kum u pulit ban pyniaid ïa ki kam be-aiñ.
Naka liang ka seng KSU kala pynpaw ka jingsngewkhia kaba jur ba ha kum kane ka por ba ka jylla baroh kawei ka dei ban long kiba peitngor ha man la ki jaka naka jingwan buhai shnong ki mynder pynban ki don ki briew bad wat ka tnad pulit kiba pynrung beaiñ ïaki briew da kaba shim pisa bad kane ka pynpaw ba ka don ka jingsynjor haka jingpeitngor wat naka liang ki bor jong ka aiñ.
