Assam, Jylliew 13:
Ha kawei ka jingjia lehse kaba khyllah bad ka bym ju kham jia, kawei ka longkmie ha ka shnong Chenguri jong ka Silchar, Assam la shem ba ka pyndih sikret jubor iala ka khunrit kaba dang 20 bnai ka rta. Ym tang katta, la iathuh ba katei ka longkmie, ka la pyndih jubor ruh wat ia ka kyiad ia katei ka khun rit ka jongka.
Kane ka jingjia, ka la paw pyrthei hadien ba ki la don kiba ujor sha ki bor ba dei khmih jong u Child Protection Officer (CPO) katei ka jaka bad ki bor pulit, kiba la leit khynra ia ka ingsah katei ka longkmie ha ka sngi Balang, kata ka 12 tarik jong u bnai Jylliew 2024, ban shimti noh ia katei ka khyllung bad kem ia katei ka longkmie na ka bynta ban pynlong ia ka jingtohkit.
‘Ngi la ioh ka jingujor ba kawei ka khyllung rit kala shah lehbein lehsat hala ka jong ka kmie bad mar ia ioh jingtip, na ka liang ka jongngi, ngi la pyntip sha ki bor pulit bad u CPO na ka bynta ban leit shimti ia katei ka khyllung’ la ong uwei na ki nongtrei ka Child Helpline.
Na ka liang utei u CPO, u Dhanjit Choudhury u la iathuh ba katei ka longkmie bad ka khyllung mynta ka sngi Palei, ki la don hpoh ka jingkhmih jong ka Child Welfare Committee (CWC), bad pyntip ba ia mynta ka jingtohkit ia katei ka longkmie ka dang iaid shakhmat bad tad haduh ban da dep ka jingtohkit, yn sa lah pat ban rai ia ki kyndon ban pynshitom pyrshah ia katei ka longkmie.
