Shillong, Jylliew 13: Ka Ministry ka tnad Earth Sciences ka sorkar India kum shi bynta ban phai dien biang sha ka jingdap 127 snem ka jingkhie u jumai bah ha Shillong ha u snem 1897 ha ka 12 tarik u Jylliew 2024 ka la pynlong da ka National Seminar ban ai jinghikai halor ki lad ki lynti kumno ban iada lada wan khie u jumai ne kino kino ki jinglynshop ka bor mariang.
Ia kane ka National Seminar ba la pynlong mynta ka sngi ha Convention Hall ka North Eastern Hills University la ia trei lang naduh ka National Institute of Disaster Management, ka Ministry ka tnad Home Affairs, New Delhi, ka tnad Disaster Management, Initiatives and Convergence Society, Hyderabad; jong ka Geology Department, ka North-Eastern Hill University, Shillong bad ka Geological Society of India, Bengaluru.
Ha kane ka National Seminar ka la don ka jingai jinghikai, ki jingbatai bad ki rukom ban ai jingiada ne pynlait im ha ka por ba khie jumai ia kito kiba shah ktah bad la pynbna ruh ia ka kynhun ka India ki ban leit mihkhmat na ka bynta ka International Earth Science Olympiad-2024bad ruh ba ka India kan leit mihkhmat ha ka IESO-2024 ka ban long ha Beijing, China.
Ha kane ka National Seminar la shim bynta kumba 350 ngut tam ha kaba la plie ia kane ka prokram ai jinghikai lyngba ka Saraswati Vandana bad bud sa ka jingthang sharak da ki kongsan jong kane ka prokram ba la don lang naduh u Col. Omkar Singh, Registrar, NEHU, Shillong kum uba pyniaid ia ka prokram, u Prof. Harsh K. Gupta, President, Geological Society of India kum u kongsan, u G. K. Kesari, ADG & HoD, GSI, NER, Shillong bad u Dr. O.P. Mishra, Director, National Centre ka tnad Seismology, MoES kum u symbut kongsan bad ruh u Prof. Devesh Walia, Dean jong ka School of Human and Environmental Science, NEHU kum uba don bynta lang ha kane ka jingpynlong ia ka National Sminar.
Haba kren ha kane ka sngi, u Prof. Harsh K. Gupta, Director ba rim ka National Geophysical Research Institute (NGRI) Hyderabad bad uba dei ruh u President, Geological Society of India, u la kren halor ka jingiaid lynti kaba ngi la dep ban mad ia ka jingkhih jong u jumai bah bad u la pynpaw ruh da kaba ong ba lada wan u jumai baroh ngi hap ban ngat lang la ka long ha kano kano ka rukom. U la pynpaw ruh ka dei pat ka kamram jongngi ba ngin sngewthuh kumno ban shim ia ki lad jingiada khnang ban lah ban pynduna ia ka jingshah ktah lada ngi la tip lypa ia kita ki lad jingiada kaba ngi la ioh jinghikai lypa ban pynkhreh lada wan khie u jumai.
Lyngba kane ka National Seminar, haba pynkut noh ia ki prokram ai jinghikai bapher bapher ban shim ia ki lad jingiada na ka jingktah u jumai kaba dei katkum ka international earth science Olympiad 2024 kaba ki la buh haduh 17 sngi, ha kane ka sngi la pynbna ruh ia ki nongshim bynta ban leit mihkhmat ia ka India sha ka IESO-2024 ka ban long ha Beijing, China ba ki ioh ia kita ki jinghikai pyntbit bad kine kiba la shah jied ki kynthup ia u Siddarth Kumar (Kerala), u Manan Sethia (Raipur, Chhattisgarh), u Rudra Pethani (Gujrat) bad Mr. Yashaswee Gupta (Rajasthan) bad ba kin long ruh kum kita ki nongai ktien (brand ambassador) na ka MoES, New Delhi.
