Shillong, Jylliew 15:
Kawei ka samla pule pule jong ka St. Anthony’s College kaba dei ruh ka dkhot jong ka National Cadet Corps (NCC) kaba la mih khmat ia ka jylla Meghalaya sha ka National Arm Wrestling & Para Arm Wrestling Championship, 2024, ka samla Aikmenlang Shabong, ka la wanrah ia ka nam ka burom ymtang ia ka jaka pule bad ki kmie ki kpa ki jongka, hynrei ia ka jylla bad ka thain Shatei Lam Mihngi hi baroh kawei hadien ba ka la ioh ban khur ia ar tylli ki takma ksiar, kawei ka takma rupa bad kawei ka takma rnong ha katei ka lympung kaba la pynlong ha Dr. Vasantrao Deshpande Hall, Civil Line, Nagpur jong ka jylla Maharashtra.
Ha katei ka lympung kaba la sdang naduh ka 6 tarik bad pynkut pat ha ka 10 tarik jong u bnai Jylliew, 2024 bad kaba la pyniaid da ka Maharashtra Arm Wrestling Association (MAWA) lem bad ka Samta Sporting Club Nagpur hapoh ka jingkhmih jong ka People’s Arm Wrestling Federation of India, kumba 3 hajur ki nongialehkai na ki 25 tylli ki jylla ka ri India, ki la wan ban iashim bynta ban ioh rah ia ka nam lahduh ha ki kyrdan bapher bapher.
Lyngba kitei ki jingjop, ka samla Aikmenlang Shabong kan ioh pat ban leit mih khmat ia ka ri India ha ka World Arm Wrestling Championship 2024 kaban sa long ha ka ri Moldova jong ka dewbah Europe ha ki bnai kiban sa wan jong une u snem 2024.
Halor katei ka jingjop jong katei ka samla Aikmenlang Shabong, na ka liang jong ka NCC Directorate, North Eastern Region ka la pynpaw ia ka jingsngewkmen kaba khraw bad ai ruh ka jingkitbok kitrwiang iaka, ba kan dang lah ban lehbha bad wanrah nam bad burom ia ka jylla ka thain bad ka ri hi baroh kawei ha ki lympung kiba kan sa leit ban iashim bynta pyrshah ia kiwei pat ki nongialehkai ba pawnam jong ki ri ka pyrthei.
