Capetown, Jylliew 15:
U nongialam ba hakhlieh duh jong ka seng African National Congress (ANC) ka ri South Africa, u la shah jied biang ban long kum u President jong ka ri, tang khyndiat sngi hadien ba jingpynbna iaka resol ilekshon jong katei ka ri, wat la katei ka seng ANC kam shym la ioh satia ka jingjop kaba pura kumba long ha ki ilekshon bal ah dep.
Katei ka jingshah jied biang jong u Cyril Ramaphosa kum u President kadei hadien ba ka seng ANC kaba u la ialamkhmat, ka la iasoi soskular ban iatrei lang ha ka sorkar synrop lem bad ka Democratic Alliance (DA), kata tang khyndiat kynta hadien jong ka jingpynbna ia ka resol election, la iathuh ka tyllong khubor na katei ka ri.
Katei ka seng DA kaba dei ka seng kaba ju kyrshan ia ki kam kamai kajih lane business, ka la rai ban buh sharud sha ka jingiakynad kaba la neh da ki phew snem bad ka ANC ban thaw ia ka sorkar kaban sah jingkynmaw ha ka thup khana jong ka ri.
Ha ka jingiathep vote ban jied ia u President ba thymmai jong ka ri kaba la pynlong ha ka sngi Thohdieng, u Cyril Ramaphosa jong ka ANC, u la lah noh ban pynliem ia u Julius Malema, u nongialam jong ka Economic Freedom Fighters (EFF) da 283 vote la 44 vote.
Ka dawbah kaba la pynlong ia ka ANC ban buh sharud ia ka jingkynad bad iatrei ryngkat bad ka DA ban thaw sorkar thymmai, kadei hadien ba kane ka seng, ha ka sien kaba nyngkong eh, kam shym la ioh shuh ia ka jingjop kaba pura lane majority kumba ka la ioh naduh u snem 1994 ter ter.
Ka jingkyrduh kam, ka jingbymbiang ki kam pynroi bad ka jingphet seng jong ki nongialam, la ong ba kidei katto katne ki dawbah kiba la pynlong ia ka ANC ba kan hiar arsut ha kane ka ilekshon 2024, wat lada kad ang hi ka seng kaba bun paid haba ianujor bad kiwei pat ki seng sain hima sima jong ka ri.
