Shillong, Nailar 09: Ban pynshlur ia ki samla pule ba kin don ia kata ka thong ban kiew sha ki kyrdan kiba shaneng ha ka pule ka puthi bad ruh ban ai burom ia kito ki samla kiba la leh bha ha ki examin SSLC bad HSSLC, ka National People’s Youth Front Shillong City mynta ka sngi ka la pynkup burom ia kito ki samla kiba la pas bha ha kitei ki examination 2025 na Nongbah Shillong.
Ia kane ka prokram pynkup burom ia kitei ki samla pule ba la kot haduh 70 ngut la wan ban pynkup burom da ka myntri ka tnad ka koit ka khiah, ka Dr. Ampareen Lyngdoh kum ka kongsan bad la sakhi lang ruh da ka jingdon lang u Working President ka State NPP u Bah Hamlet Dohling, u Nongai ktien ka State NPP u Bah H.M Shangpliang, ki samla pule, ki kmie ki kpa bad kiwei kiwei ki nongialam ka NPYF Shillong City.
Haba kren ha kane ka sngi kum ka kongsan, ka Dr. Amapareen Lyngdoh ka la ai ka jingiaroh ia ka NPYF Shillong City, kaba la shim ia kane ka sienjam ban ai mynsiem ia ki khun samla ha ka pule ka puthi bad khamtam ban ai burom ia kito kiba la leh bha ha ki SSLC bad HSSLC kaba long ruh ka jingai mynsiem na ka bynta ka pateng jong ki samla pule ka jylla.
Ka la shim kabu ruh ban ai khublei kyrpang ia kito ki samla kiba la leh bha ha kitei ki examination ha kaba ka jingpas ka la poi sha ka 91% kaba long ka jingjop na ka bynta ki samla. Ka la ong ruh ba ka sorkar MDA ha ka jingialam u Myntri Rangbah ka jylla u Conrad K. Sangma ka la phai khmat bha sha ki samla pule lyngba ki Policy ha kaba mynta ka Jylla ka don ia kata ka Engineering College, Medical College bad ruh ka State University bad ka thong hi ka long ban kyntiew ia ka pule ka puthi bad ka jingmyntoi ki khun samla jong ka jylla.
Shuh shuh, ka sorkar ka phai khmat ruh wat ha ka liang ka ioh kam ka ioh jam ki khun samla ha kaba sorkar mynta ka pyntreikam lyngba kita ki Employment Agency bad ka thong kaba hakhmat eh ka long ban iarap ruh na ka bynta kito ki samla kiba ym don kam don jam hapoh ka jylla.
