Nongpoh, Nailar 09: Ki nongialam ka Byrnihat Circle, ki la dawa na ka sorkar jylla lyngba ka tnat Labour, ba ki dei ban shimkhia ha ka ba pynbiang ia ki Labour License, na bynta kito ki nongtrei bar jylla, kiba wan ban trei bylla ha ki jaka bapher bapher hapoh ka jylla Meghalaya.
Katei ka jingdawa da ki nongialam ka FKJGP Byrnihat Circle, ka dei hadien ba ki la leit ban khynra Labour License ia ki nongtrei bar jylla, kiba trei bylla ha ki Karkhana bad ki dukan bapher bapher, kiba don ha 13mer, Byrnihat, ha kaba ki nongialam ka FKJGP, Byrnihat Circle, ki la lap ba la jan baroh na ki nongtrei bar jylla, kim don ia ki kot ki sla kiba biang bad khamtam eh haba iadei bad ka Labour License.
Kum ban shu kdew, ba hynnin ka sngi ba ki nongialam ka FKJGP Byrnihat Circle, ia kaba la ialam da u samla Kitborlang Suting, President ka FKJGP Byrnihat Circle, nangta u Samla Artison Khongstid, General Secretary bad u Bah Dibos Chyne, ia kaba la synranlang da ki dkhot katei ka Circle bad ki nongialam ka FKJGP North Khasi Hills District.
Ia katei ka kam ban leit khynra Labour License ia ki nongtrei bar jylla ha 13mer, Byrnihat.
Ki nongialam ka FKJGP Byrnihat Circle, ki la ong ba ka daw kaba la pynlong ia ka seng ba kin pynlong ia katei ka jingleit khynra Labour License ha ki Karkhana bad ki dukan bapher bapher, kiba don ha ka thain 13mer Byrnihat, ka dei hadien ba ki la ioh jingtip halor ka jingdon ki briew nabar, kiba la pyrshang ban bsuh khlieh sha kitei ki jaka, da kaba leh kum ki nongbylla.
Shuh shuh, ki la ong ba kumba baroh ki la tip ba ka sorkar Assam, ka la kyndang naphang ia baroh ki mynder kiba la shong beain ha ka jylla Assam, kumta halor katei ka jingleh ka Assam, ka pynlong ia ka seng ba kan hap peitngor bad khamtam eh ba katei ka thain 13mer Byrnihat, ka dei kawei na ki jaka kaba don ha syndah eh bad ka Assam.
Nangne shakhmat, ngin dang pynjur ban khynra ia ki kot ki sla bad khamtam eh ia ki Labour License na bynta kito kiba wan trei bylla bad lada ngi lap ba kim don ia ki kot ki sla bad khamtam eh ia ki Labour License, na ka liang ka seng ngin ym ailad bad ngin pynher krad beit ia ki.
Namarkata, kumba mynta ha ka jingjurip ngi la lap ba baroh ki nongtrei ha katei ka jaka kim don ia ki Labour License, kaba long kum kata ka kot ban pynshisha ba ki don ka hok ba kin long kum kita ki nongtrei bylla, ha kawei pat ka liang, ngi kyntu ia ka tnat Labour, khnang ba yn ym mih kino kino ki jingjia ba sngewsih, lada ki sengbhalang ki leit ban khynra kot ha ki jaka ba trei da ki bar jylla
