Shillong, Naitung 14: Ban khanglad na ka jingwan rung tuh ki Nong Bangladesh sha ka jylla lyngba ki shnong khappud ka jylla, ka sorkar jylla ka bthah sha baroh ki Deputy Commissioner bad ki Superintendent of Police jong ki District bapher bapher hapoh ka jylla ba kin long kita kiba peitngor na ka bynta ban khanglad ia ka jingwan rungtuh ki nong Bangladesh sha kane ka jylla.
Kane ka jingbthah ka sorkar ban long kita kiba peitngor halor ki kam rungtuh ki Nong Bangladesh sha ka jylla, ka dei ruh hadien ba ka kynhun ki runar ba pyndonkam da ki tiar na Bangladesh ha ka jingialm u Pulit Constable ki la rung tuh na ka Shnong Rongdanai, ha kaba ki la bom la shoh ruh ia ki nongshong dukan bad lute ruh ia ki pisa bad ki mar ba kordor.
Haba krnes had kiu lad pathai ha ka jingiashong pyrkhat ha ka sngi Balang, u Symbut Myntri ka sorkar jylla bad uba dei peit ruh ia ka tnad ka kam pohïing u Bah Prestone Tynsong u la ong, “ Baroh ki Deputy Commissioner bad ki Superintendent of Police jong ki District hapoh ka jylla, la dep ban bthah ia ki ba kin long kiba peitngor na ka jingwan rung tuh ki Nong Bangladesh kumba ka la don ka khep ba ki Nong Bangladesh ki wan rung tuh sha ka jylla”
U la pyntip ruh ba ka don ka jingrung tuh ki Nong Bangladesh na kiba bun ki jaka na East Khasi Hills shaduh sha Dalu ha Garo Hills bad ruh wat ki thain khappud ka India bad Bangladesh ba hap hapoh u pud u sam ka jylla Meghalaya.
“ Ngi la long kiba peitngor bad nga kyrmen skhem ba ki bor pulit kin lah ban kem ia kino kino kba wan rung beain na khappud sha ka jylla bad ruh ba kin pynphai khylla” ong u Bah Tynsong.
Haba kylli, u Bah Prestone Tynsong, u la iathuh ruh ba ka sorkar ka la dep ban phah ia ka kaiphod halor ka jingshah kem ki Nong Bangladesh dang shen sha ka Ministry of Home Affairs (MHA).
“ Katkum ka kaiphod ba la ai da ki Pulit ka jingwan rung ki Nong Bangladesh kam don kaei kaei kaba sha lyndet bad ka jingthmu hi ka long ban wan leh ia ki kam sniew bad ki kam tuh ki kam lute” ong u Bah Tynsong.
Shuh shuh, u la iathuh ruh, uwei na uba la shah kem bad uba kawang bom u la lait phet biang ban rung sha Bangladesh bad halor kine ki kam rung beain, ki bor pulit bad ki BSF ki dang bteng ban tohkit na ka bynta ban ioh kem ia u.
Kumba ki BSP kila pynbna ba kan don ka jingtalasi ne peitngor ( Operation alerts) ha ki jaka khappud ka India bad Bangladesh ba hap ha ka jylla Meghalaya, u Symbut Myntri ka sorkar jylla, u la ong, “ ba ka sorkar jylla ruh ka la pyntreikam ia ki juh ki buit treikam ban khanglad na ka jingwan rung tuh ki Nong Bangladesh sha ka jylla bad naduh ki bor pulit bad ki BSP ki la iatrei lang na ka bynta ban khanglad bad ban pynpulom ia kum kine ki kam rung tuh ki Nong Bangladesh sha kane ka jylla, u la bynrap.
