Nongpoh, Nailur 14: Ki la don kumba 12 tylli ki Village Organisation (VO) lem bad 110 tylli ki Self Help Groups (SHGs), kiba hap ha ka Tiew Rani Cluster Level Federation, ki la ioh ia ka ophis treikam ba paka bad kata ka dei ba hynnin ka sngi, ha kaba u Bah Sohthenes Sohtun kum u MLA ka thaiñ, u la leit ban plie ia katei ka ophis thymmai jong ki, ia kaba la tei hapoh ka shnong Ranibari, ka shnong kaba don ha khappud ka Meghalaya bad Assam.
Ha katei hi kajuh ka sngi, nalor ba la plie ia ka ophis treikam ka Tiew Rani Cluster Level Federation, la ioh ruh ban plie paidbah noh ia ka Livelihood Service Center hapoh ka shnong Ranibari, khnang ba ki briew kiba don ha ki SHGs kin ioh ban pyndonkam ha ka ban buh ia ki symbai jingthung jingtep bad ba ki la lait ban leit buh sha kiwei ki jaka bad kiba la hap sha ka jylla Assam.
Ki longkmie kiba don ha ka kynhun VO bad SHGs, ki ban sa ioh jingmyntoi na kitei ki jingtei ka sorkar bad kaba la plie paidbah da u MLA, baroh ki dei ki shnong kiba don ha khappud ka Meghalaya bad Assam, kita ki kynthup ia ka shnong Ranibari, Bernongsai, Hawla, Bakhlapara, Lyngkhung, Jimbrigoan, Balakhwa, Halher, Umshru, Mairapur, Gunpata lem bad ka shnong Nongkyllang.
Kiba la sakhi ha katei ka sngi, ba la plie paidbah ia kitei ki jingtei ka sorkar, ki kynthup ia u Dr. P. Hajong, BDO ka Jirang Block, u R. Sangma, President ka Tiew Rani CLF, ki dkhot ka VO bad SHGs, ki nongialam shnong lem bad shibun ki longkmie.
Haba kren ha katei ka sngi, u Bah Sosthenes Sohtun, u la ong ba kum u MLA u kwah bad angnud ba un pynpoi ia shibun ki kam pynroi sha ki shnong khappud hapdeng ka Meghalaya bad Assam, khnang ba kan long ka jingmyntoi na bynta ki paidbah bad ha kajuh ruh ka por, ka long kum kita ki sakhi ba kitei ki shnong ki dang dei shisha ha Meghalaya bad baroh ki kam pynroi la theh da ka sorkar Meghalaya.
U la kyntu ruh ia ki dkhot ka VO bad SHGs, ba kin pyndonkam hok bad sumar ia katei ka ophis treikam ka Tiew Rani Cluster Level Federation bad ruh ia ka Livelihood Service Center, khnang ba kan long ka jingmyntoi ia ki bad ia kiba hadien habud ruh kumjuh.
