Nongpoh, Nailar 20: Ar sngi hadien ba la mih ka jingiakulmar hapdeng ki briew na Meghalaya bad Assam, kaba dei ruh hadien ba ki paidbah ka shnong Maikhuli, ki la leit ban pynkhyllem noh ia ki post Ilektrik, kaba la wan pynieng da ka Assam State Electricity Board (ASEB), mynta ka sngi, ki bor District ka Ri Bhoi, ha ryngkat u MLA Jirang, ki la hiar sha ka shnong Maikhuli, na bynta ban iakren bad ban sngap ia ka sur ki paidbah ha katei ka shnong.
Kiba la hiar sha Shnong Maikhuli, na bynta ban sngap ia ka sur u paidbah bad ruh ban kren na bynta ban wanrah ia ka jingsuk ha katei ka shnong, ki kynthup ia u Bah Sosthenes Sohtun, MLA Jirang, nangta u Abhilash Baranwal, Deputy Commissioner ka Ri Bhoi, u V.S Rathore, Senior Superintendent of Police ka Ri Bhoi, u Bah Eric Dkhar, Magistrate ka Ri Bhoi lem bad kiwei.
Lyngba katei ka jingialang, ba la donlang u MLA lem bad ki Bor Distrik na Ri Bhoi, ki paidbah na katei ka shnong, ki la pynpaw hakhmat u MLA bad ki Bor Distrik, ba kin leh ia kaba donkam bad ban pyntip sha ka sorkar, halor ka jingeh kaba ki paidbah na katei ka shnong ki iakynduh.
Haba iadei bad katei ka jingjia ha Maikhuli, na ka liang u MLA u la btah ia u Deputy Commissioner, ba u dei ban thoh kawei ka jingujor sha ka sorkar, ban pyntip halor ka jingeh ba ki paidbah ha katei ka shnong ki iakynduh.
Nalorkata, u la ong ruh ba kum u MLA un sa shimkhia halor katei ka mat bad uba la ong ruh ba un sa ialam ia ki longkmie na ka shnong Maikhuli, ba kin sa leit ban kynduh hakhmat u Conrad K. Sangma, na bynta ban iakren shai bad ruh ban weng noh ia ka jingeh ba shait kynduh ki paidbah ha katei ka shnong.
