Nongpoh, Nailai 20: Namar ba la sniew palat liam ka surok na Amdubighat sha Amphreng bad thut eh ha ka leit ka wan ki paidbah, khamtam eh ha ka por Lyiur, ki paid nongshong shnong ka Amphreng, ha ka sien ba-ar, ki la hap ban iamih paidbah, na bynta ban maramot hi ia katei ka surok sniew bad kaba la shah iehbein, khlem da don kiba peit ba khmieh ne kiba iarap ban pynioh ia ka surok bha bad kaba bit ba biang ha ka leit ka wan ki paidbah.
Katei ka surok sniew na Amdubighat sha Amphreng, ka dei kaba don ia ka jingjngai kumba 2km eiei bad ka dei ruh kawei na ki surok ka Meghalaya bad kaba don ha syndah khappud bad ka jylla Assam, hynrei ka jingleh matlah bad ym shimkhia ka sorkar halor katei ka surok, ka pynlong ia ki paidbah jong katei ka shnong, ba kin syrtok eh ha ka leit ka wan bad khamtam eh ha ki por Lyiur.
Haba maramot ia katei ka surok, la iashimbynta da baroh ki paid nongshong shnong ka Amphreng, ha kaba ki la hap ban maramot hi ia katei ka surok da ka mynsiem kaba sngewkhia eh bad sngew shah ieh khunswet, khamtam eh ba ki dei kiba shong ba sah ha khappud bad ka jylla Assam.
Halor ka jingsniew katei ka surok bad kaba la pynlong ia ki paidbah jong ka shnong Amphreng, ba kin hap mih paidbah ban maramot hi, wat ki nongtrei sorkar, kata naduh ki nongtrei ka koit ka khiah, ki nonghikai bad kiwei, ki la pynpaw lem ia kata ka jingsngewkhia, ban iohi ba ha kane ka juk kaba mynta, ba ki briew ki hap ban iamih paidbah ban maramot hi ia ka surok, kata ka dei hadien ba ki la shah ieh khunswet, khlem da don kiba peit ba khmieh ne kiba iarap ia ki.
Ka sur kaba mih na ki briew ka shnong Amphreng bad kumjuh na ki nongtrei ka koit ka khiah bad nonghikai, ki la kyrpad ia ka sorkar bad khamtam ia u nongmihkhmat jong ka Mawhati Constituency, ba kin shimkhia lem na bynta ban pynioh surok bha sha katei ka shnong Amphreng, namar na ka jingsniew ka surok, ka la buh jingeh shisha ia ki paidbah ha la leit ka wan.
Ki la pynpaw ruh, ba ka jingeh kan dei ia ki paidbah bad khamtam eh ia ki khynnah skul, kiba la hap ban iaid kjat lyngba ka surok kaba sniew tasam, kata haba ki leit skul na Amdubighat sha Amphreng.
