KYLLON ÏAP 8 NGUT KI LEHNOH NAXAL, U WEI U SHIPAI HAKA JINGTHER KULI HA CHHATTISGARH

Kumba 8 ngut ki lehnoh Naxal kila kyllon ïap haka jing ther kuli bad ki shipai hynne ka step phyrngap, bad uwei u shipai u la shah siat pynïap katba 2 ngut kiwei pat kila mynsaw jur.
Katei ka jingïa ther kuli kala jia hynne ka step ha kawei ka khlaw Abhujmad, ha kaba ka kynhun ki shipai naki saw tylli ki district jong ka Narayanpur, Kanker, Dantewada bad ka Kondagaon kila snohkti lang ban ïakhun ïaki lehnoh Naxal.
Ka jingsdang jong ki shipai ban pynliem ïa katei ka kynhun lehnoh kala sdang naduh ka 12 tarik Jylliew ha kaba ki shipai ba kynthup ïaki District Reserve Guard nakitei ki 4 tylli ki district, ka Special Task Force bad ka 53rd Battalion jong ka Indo-Tibetan Border Police kila snohkti lang ban ïakhun ïa kitei ki lehnoh bad kane ka dei ruh ka sien kaba ar kaba ki shipai kila hiar thma ïa katei ka kynhun lehnoh bad ka jinghiar thma kaba nyngkong kaba la long haka 7 tarik Jylliew bad ioh pynïap kumba 5 ngut ki lehnoh, ong ka tyllong khubor naki heh pulit ka Raipur.