New Delhi, Jylliew 15:
U Lieutenant Governor jong ka nongbah Delhi, u V.K. Saxena hynnin ka sngi, ka 14 tarik jong u bnai Jylliew, 2024, u la aibor ban iaid shakhmat ia ka mutkotduma ban pynshitom ia ka nongthoh kot ba pawnam jong ka ri, ka Arundhati Roy, halor ka jingkynnoh ba kala kren ia ki kyntien ban kyrshan ia ka jingthmu ban pynlaitluid ia ka Kashmir na ka ri India ha ka jinglang ‘Azadi-The Only Way’ kaba la pynlong ha LTG Auditorium, Copernicus Marg, jong ka nongbah New Delhi ha ka 21 tarik jong u bnai Risaw, 2010.
Katkum ka kyrwoh kaba pyllait na ka ophis treikam utei u Governor, ka Raj Niwas, la iathuh ba u Governor u la mynjur ban iaid shakhmat ia ka mukotduma ban pynshitom ia ka Arundhati Roy lem bad u Dr. Sheikh Showkat Hussain, nonghikai barim jong ka skulbah Central University of Kashmir, hapoh ki kyndon ain jong 13 bad 45 (1) jong ka Unlawful Activities (Prevention) Act, 1967 halor ka jingiadon bynta ka jongki ha katei kajuh ka jingialang kaba la pynlong ha u snem 2010 ban iakren halor ka phang jong ka jingpynlaitluid ia ka Kashmir.
Kum ban shu kdew, utei u Governor jong ka Delhi ha u bnai Risaw jong u snem 2023, u la ai bor ruh ban pynshitom ia kitei ki ar ngut, kata ia ka Arundhati Roy lem bad utei u Dr. Sheikh Showkat Hussain hapoh ki kyndon 196 CrPC bad lai tylli ki kyndon jong ka Indian Penal Code (IPC) kiba kynthup ia ka 124-A, 153-A, 153-B, 504 bad ka kyndon 505.
Ia ka ejahar jong kane ka mukutduma, la ujor da u Sushil Pandit, u nongtrei mon sngewbha jong ka Kashmir ha ka 28 tarik jong u bnai Risaw 2010 ha kaba la kynnoh ba ka Arundhati Roy lem bad utei u Dr. Sheikh Showkat Hussain, ki pynmih ia ki kyntien kiba wanrah ia ka jingbymshongsuk shongsain bad ia paid ia pra ha katei ka jingialang Azadi-The Only Way, kaba la pynlong ha u snem 2010. Sa ar kiwei de kiba la shah kynnoh don bynta lang ha katei ka juh ka jingialang, kiba kynthup ia u Sayed Ali Shah Geelani, u nongialam na Kashmir bad u Syed Abdul Rahman Geelani, nonghikai jong ka Delhi University kila khlad noh hapdeng jong kine ki snem ka jingiaid ka jingtian bishar.
Kum ban shu pyntip hangne, Arundhati Roy kadei kawei na ki nongthoh ba la pawnam jong ka ri, kaba la kha ha ka nongbah Shillong bad pynheh pynsan pat iaka ha ka jylla Kerala bad kaba la pynmih bun tylli ki kot kiba la pawnam ha ka pyrthei, ba kynthup ia ka ‘The God of Small Things’ kaba la ioh ia ka khusnam Booker Prize ha u snem 1997 bad kaba la don ha ka thup New York Times kum kawei na ki kot ba pawnam ha utei u snem.
