Nongpoh, Nailar 25: Ki nongialam ka kynhun ki Nongniah Kali Pickup ka Ribhoi Commercial Pickup Owner & Driver Association (RCPODA) ka la ther tyngeh pyrshah ïaka jingshah Kynnoh ba ki ju kit ïaki mar ar Number bad ban pynpoi pat sha Bangladesh dakaba ong ruh, ba mar sien thep ïa kine ki mar hapoh ka kali jong ki, ki kylla long noh ki mar ar number hynrei katba kine ki mar ki dang don ha ïew ka long hi ka mar shi number.
Ïa kane la Pynpaw da uwei u nongialam ka kynhun u Bah Stanwell Manih kum u President hadien ba kum ki Nongniah Kali Pickup lane ki trai pickup ki la mat shibun ki jingshah Kynnoh ha kaba ia dei bad ki mar kiba ki ju kit ki dei ki mar Beaiñ bad ban shah pynthud ruh haki lynti syngkien dakaba shah khrong pisa haki Seng Bhalang bapher bapher bad ki Pulit ha shilynter ka Surok bah.
Haba kren sha ki lad pathai khubor haka jingiadonlang khrui ki dkhot jong ka kynhun u President jong katei ka kynhun u Bah Stanwell Manih u la Pynpaw iaka jingsngewkhia halor ka jingshah nion beiñ kine ki Nongniah Pickup dakaba pyntieng pynsmiej iaki bad ba ki dei ban siew iaka pisa wat la kine ki Nongniah Kali ki dei hi tang ki nongbylla ban pynpoi hok iaki mar sha ki jaka ba la bthah da ki trai.
U la iathuh, ba kum ki Nongniah Pickup ki ju kit iaki Masi, ki muit, ki syiar na Byrni bad ki leit ban pynhap pat sha kylleng ki jaka jong ka ri khasi kumba la phah daki trai bad kam shym la don kum kita ki jingshah Kynnoh ba ki kit iaki mar beaiñ ban shalan sha Bangladesh bad u la ong ruh, lada kine ki mar ki long beaiñ balei pat kim khang iaka ïew kaba la tip paidbah ba ka don ha Byrni, balei ban kheiñ beaiñ tang mar sien thep hapoh kali bad ban lum pisa pat na ki Nongniah kiba dang dei tang ki Nongniah Kali ban bsa ha iing ha sem.
Utei u nongialam u la ther ther tyngeh ruh iaki Seng Bhalang bad ki Pulit dakaba ong, haka jingshisha kum ki Nongniah Kali ki dei ban sngew shngaiñ ba lada don kano kano ka jingjia kin ioh ban pynsngew sha ki, hynrei lada maki hi ki pyntieng pynsmiej nangno pat kin leit wat jingiarap.
U President katei ka kynhun, u kyrpad iaka sorkar ba ka dei ban leh eiei halor kane ka jingeh kaba ki Nongniah Pickup ki ju mat bad u la kyntu ruh ba ki dei ban pynbiang noh da kino kino ki kot ki sla naka bynta jong ki khnang ba kan nym don shuh ka jingshah pynthud haki lynti iaid haba ki kit iaki mar ban pynpoi sha kiwei pat ki jaka.
