Nongpoh, Nailar 25: Ka kynhun ialehkai kaba la tip kum ka Shipara FC, ka la khur ia ka namjop ha ka Penalty Shoot Out ba shisngi, ia kaba la pynlong da ka RBYF 13mer Unit, kaba ki la pynlong ha madan ialehkai ka shnong 13mer, Ri Bhoi.
Ka thong jong ka RBYF, ba ki la pynlong ia katei ka Penalty Shoot Out, ka long kum shi bynta ban pynsaphriang ia ka khubor ban pyrshah ia u Drok, namar kumba ka long mynta, ba la bun ki samla kiba la ngop ha u Drok, uba long u jingdih pynbuaid bad uba wanrah jingma hapoh ka imlang sahlang.
Ha katei ka lympung ialehkai ba la pynlong da ka RBYF, ki la don kumba 97 tylli ki kynhun kiba la wan ban iashimbynta, hynrei ha ka jingiakhun kawei ia kawei pat ka kynhun, ka Shipara FC, ka la khur ia ka nam lahduh.
La pynkut ia katei ka lympung ialehkai ba shisngi, da ka jingdon u Bah Neversad Makdoh Sport Secretary ka RBYF Sengkmie, kum u kongsan, u Vigan kharkongor, Asst Finance Secretary ka RBYF Sengkmie, u samla Franky Rani, President ka 13mer unit, u Bah Kynsai Majaw, General Secretary 13mer unit lem bad kiwei.
