Nongpoh, Nailar 29: Ka jingther u lapbah kaba neh bun kynta hynnin ka janmiet ka la wanrah iaka jingshlei um kaba jur ha ki bynta jong ka Jorabat, Killing bad Khanapara, haduh ba ki surok kiba ju ïaid ki kali kila kylla long kum ki wah bad bun ki kali ruh kila ngam ha ka um haduh kim lait shuh ban ïaid bad wanrah ruh ia ka jingdheng kali kaba jur.
Kum ban pynkynmaw, dang shen ha ki lad pathai khubor u Myntri rangbah ka jylla Assam u Himanta Biswa Sarma u la kynnoh ba ka jingshlei um ha kitei ki shnong khappud bad wat ha ka sorbah Guwhati, ka dei na ka jingtih khyndew, ka jingtihmaw na ki lum ka Meghalaya ha ka thain Khanapara bad kiwei ki shnong khappud ka Meghalaya bad Assam.
Ia kane la sakhi ruh hynnin ka sngi ba ka sorbah Guwahati ka la shlei um bad kynthup ruh na Khanapara bad Jorobat ka la dei ka jaka kaba ki paidbah ki ju mad jingeh ha ka jingshlei um kaba la ju jia man ka por, kaba dei na ka daw ka jingbym don nala tuid um kiba biang.
Ka jingther u lapbah hynnin ka sngi ka la pynlong iaka um ban dap khamtam eh ha khrum jingkieng Jorabat, haduh ba ka um ka la tap ïa u surok bad pynlong ïa ki paidbah ban hap jngi lyngba ka um jaboh bad ahor ban jam sha shilliang ka surok.
Ha Killing bad Khanapara, ka jingkylla wah jong ki surok ka la pynkyndit bad ka la pynmih ruh ia ka jingsngew lyngngoh iaki paidbah nongshong shnong, namar la katta snem ym pat ju sakhi ïa ka jingshlei um kum ba la jia hynnin ka sngi, kaba la wan rah ruh haduh ba ym lah shuh ban iohi ia ka surok bad tang ka ka um kaba la tuid lyngba ka surok kaba la buh jingeh ïa ki Kali paidbah, ki nongleit nongwan, ki kali paidbah bad ruh ki paidbah ba sah ha katei ka thain.
