Nongpoh, Nailar 28: Ki nongialam ha ryngkat ki dkhot ka RBYF Umsning Circle, ha ka 27 tarik u Naitung 2025, ki la leit ban ai jingiarap da ki Ben bad dusbin sha ka Govt. LP School Umsaitsning, ka skul sorkar kaba la don jingduna ha baroh ki liang.
Katei ka jingleit ai jingiarap ne noh synniang da ka RBYF Umsning Circle sha katei ka skul, ka dei hadien ba ki la ioh jingtip, ba ki khynnah skul kiba pule hapoh katei ka skul, ki shem jingeh na ka jingbym biang ki ben, desk lem bad kiwei ki jingduna.
Ha katei ka sngi, ba ki nongialam ka RBYF Umsning Circle, ki la leit ban ai jingiarap sha katei ka skul, ki la iohsngew ia ka sur kaba la pynsngew da ki nonghikai hapoh katei ka skul, kiba la ong, ba ki shem jingeh jingjynjar halor ka jingduna ki ben bad desk bad khamtam eh ka building jong katei ka skul.
Haba iadei bad ki building, ki la ong ba ka dei kaba la khapngiah eh namar ka jingdon ki khynnah bad ka building kam iahap shuh, ha kaba ki khynnah ki la hap ban shu shong khapngiah hapdeng ki para khynnah skul.
Lyngba jong katei ka sngi, ba ki nongialam ka RBYF Umsning Circle, ia kaba la ialam da u Balakmen Nongbri, ha ryngkat ka jingdon kiwei ki nongialam ka RBYF, ki la buh ia ka jingkyrpad ia ka sorkar, ba ka dei ban phaikhmat sha katei ka skul, kaba dei ka skul kaba la rim, kaba la sei ia shibun ki khynnah pule bad kiba la don mynta ha ki kyrdan bapher bapher, ba ka dei ban phaikhmat bad ban iarap ia ki jingdonkam hapoh katei ka skul.
