Nongpoh, Nailar 28: Naduh kiba haïing hasem, ki khun ki kti, ki khynnah skul, ki nonghikai bad ki paidbah kiba la leit ban sngewlem ha ka jingleh burom khatduh ia u Babu Everlasting Pyrgrope, Principal ka Mynkhen Higher Secondary School, Bhoirymbong kim lah shiusha khlem da jaw ki ummat haba kren halor ka jingiaid lynti utei u rangbah uba la noh synñiang shisha ha baroh ki liang sha ka imlang ka sahlang.
Kum ban pynkynmaw, na ka jingban ka jingpang jingshitom u Babu Everlasting Pyngrope u la khlad noh ha ka step jong ka 26 tarik u Nailar 2025 hadpeng ka jingshah sumar ha Oppolo Hospital Guwhati bad mynta ka sngi la leh don burom khatduh noh ia ka met ba dang sah jong u ha u Lum Jingtep ka Balang Presbyterian Umroi.
U Babu Everlasting Pynrope um dei satia tang u Nonghikai ne u Principal ka Mynken Higher Secondary School Bhoirymbong, hynrei u la dei ruh u Tymmen Basan ka Balang Presbyterian Umroi, hakaba kum u rangbah u la don bynta shisha ban synniang na ka bynta ka pule ka puthi, ka jingim ba kynja mynsiem bad ruh wat na ka bynta ka bha ka miat jong ka imlang ka sahlang.
La leh burom khaduh ruh ia ka met jong u Babu Everlasting Pynrope, ha kaba la sdang shwa na ka ingsah jong u ha Umroi Jaiawpdeng, ba ka Balang Presbyteiran Umroi ryngkat ka Pastorate ki la pyndep ia ka niam ka rukom bad bun sa ka jingleh burom ha ïingmane ka Balang Presbyterian Umroi bad leit rah sha Mynken Christian Higher Secondary School Bhoirymbong kaba u bat kum u Principal bad khatduh la leh burom ha lum jingtep shwa ban tep don burom noh ia ka met ba dang sah jong u.
Kawei na ka bynta kaba la pynum mynsiem bad jaw ki ummat haba leh burom ia ka met une u rangbah, ka dei ka jingiathuh khana lyngkot shaphang ka jingiaid lynti u Babu Everlasting Pynrope bad ruh kum u Rangbah u la don bynta shisha ha baroh ki bynta ban kyntiew ia ka jingnang jingstad, ka pule ka puthi, ki kam ialehkai sport bad kiwei kiwei de ki kam kiba u la leh na ka bynta ka dong bad ka thain.
La sakhi ruh ha kane ka sngi da ki hajar ki paidbah, kiba haing ha sem, ki lok ki jor, ki kha ki man bad kynthup ruh naduh ki Pastor, ki riew pawkhmat bad kiwei kiwei ki la wan ban sngewlem ha kane ka jingleh burom khatduh ia ka met ba dang sah jong u Babu Everlasting Pyngrope.
