Nongpoh, Nailar 29: Namar ka jingshah khniot bein ki Local Contractor ha ki kam ki jam ha Ri Bhoi District, ha kaba bun ia ki kam Contractor la trei da ki Contractor kiba na shabar ka District, ki Contractor ka Ri Bhoi ha ka lama ka All Ri Bhoi Government Contractors and Suppliers Association mynta ka sngi ki la pynlong syndon da ka jingiakynduh lang khnang ban ia kren kyrpang halor ka jingeh ki local Contractor na Ri Bhoi District.
Ia kane ka jingiakynduh lang la pynlong ha Dorbar Hall, Sajer ha Nongpoh ha kaba la wan poi da ki spah ngut ki Contractor, kiba la pynpaw halor shibun ki jingeh kaba ki ia kynduh bad kawei na kata ka dei ka jingbym ju ioh kam ha ki tnad sorkar bapher bapher bad la kynnoh ruh ba kiba ioh ia ki kam ki dei ki biew kiba na shabar bad kita ki High Level Contractor.
La ia kren ruh ha kane ka sngi, nalor ka jingbym ioh kam ioh jam ki local Contractor, ki la pynpaw ruh ba ka sorkar ka la shu wan rah beit da kata ka Package kaba la kot da ki klur klur tyngka, ha kaba ym ju phiah lem ia ki kam ki jam bad kiba lah ban trei ia kitei ki kam ki dei tang ki High Level Contractor.
Kumba ki la ia kren naduh ka jingbym ioh kam ioh jam, ka jingpynslem ban pynlait ia ka Bill bad ka jingioh kam bun da ki Contractor kiba na shabar ka District, ha kane ka sngi ki la ia kren sani bha ia kita ki jingeh ba ki ia kynduh bad ban weng ia kane ka jingeh ki la rai syndon ban pynsngew sha ka shkor u myntri rangbah ka jylla u Conrad K. Sangma.
Haba kren ruh sha ki la pathai khubor, u Vice President katei ka Association u Bah Plielad Tiewsoh, u la pynpaw ba kum ki local Contractor ki da sngewkhia shisha halor ka jingshah khniot bein ki local Contractor bad bun na ki kam la ioh trei da ki Contractor kiba na shabar ka District katba ki local contractor ki long tang ki nongpeitkai.
“Dei halor kane ka nongrim hadien ba la ia shong pyrkhat bha halor kitei ki jingeh, ka Association ka la rai ban leit kynduh ia u Myntri rangbah u Conrad K. Sangma ban pynsngew ia kine ki jingeh ki local Contractor bad khamtam ban dawa ruh ba 80% ki kam ki jam ha kane ka District dei ban ioh ki local Contractor” ong u Bah Tiewsoh bad bynrap ruh ba ka Association kan dang iaid buddien bad iai trei na ka bynta ka jingmyntoi ki local contractor ha kaba kum ki local contractor ym ba pyrshah ia ki kam pynroi kiba wan ha kane ka Ditrict, hynrei ki don hok ruh ban ioh ban trei haba wan ki kam pynroi ha la ka jong ka District” u la bynrap.
