Nongpoh, Nailar 29: Na ka jingther u lapbah ha kine ki sngi ha kaba la sakhi ba bun ki wah ki la shlei um bad la ktah ruh wat ia ki ïing ki sem bad ka leit ka wan ki paidbah bad ha kawei pat ka jingjia ba sngewsih uwei u samla katba u dang leit pynjhih ia lade shabar u la hap kynsan sha ka wah ba shah rong syndon ha ka umsaw haduh ba la 3 sngi kynthih mynta ym pat lap ia ka met jong u.
Kane ka jingjia ka la jia ha ka miet jong ka 27 tarik u Nailar 2025 ha ka por 9 baje haduh 10 baje mynmiet ha kaba uwei u samla ba la tip kyrteng kum u Rohithas Chaudry, 27 snem ka rta na ka shnong Hograpara, 15mer, hadien ba la dep bam ja miet u la mih shabar ban leit pynjhih, hynrei kynsan kynsan da ka jingbakla u la hap sha ka wah bad u la shah rong noh ha ka umsaw kaba khlain kaba la ktah na ka jingshlei um ha kine ki sngi.
Kane ka wah ka dei ka wah kaba mih na 9mer shaduh 15 mer ha khappud ka Meghalaya bad Assam sha ka thaiñ Byrnihat bad ha kine ki khyndiat sngi la sakhi ruh ba ka jingshlei um ka la ktah jur ia ki paidbah bad ki kali paidbah khamtam naduh na Khanapara, Jorbat bad ter ter.
Kumba la iathuh da u kpa jong utei u samla, u Sohanlal Chaudry, la ong ba utei u khun jong u, u dang shu wan na Dukan bad hadien ba la dep bam ja miet u la mih ban leit pynjhirh shabar, hynrei khlem poi pyrkhat u la hap sha ka wah ba ka um kaba khlain na ka jingshlei um ka la rah noh ia ha katei ka wah bad haduh mynta kim pat lap dien satia ia ka met jong u.
Shuh shuh, la ong ruh haduh mynta ka sngi ki dang pynlong ia ka jingiawad ia utei u samla ba la shah rong ha ka um kaba khlain na ka jingshlei um bad ha kane ka jingiawad ia utei u samla la wan ruh d aka kynhun NDRF ban bteng ka jingiawad ia une u samla ba la shah rong ha ka umsaw.
