Nongpoh, Nailar 30: Hadien saw sngi ka jingbteng ban iaid wad ia ka met u samla ba shah rong ha ka umsaw na wah 15 mer bad mynta ka sngi la lap noh ia ka met jong u sharum ka wah Umtrew ha Byrnihat ba la hap sha u pud u sam ka jylla Assam.
Kum ban pynkynmaw, une u samla ba la shah rong ha ka umsaw na 15 mer Assam side u dei uba la tp kyreng kum u Rohithas Chaudry, 27 snem ka rta bad u la shah rong ha ka um naduh ka miet jong ka 27 tarik u Nailar 2025 kaba dei hadien ba u la hap kysan sha ka wah ha ka jingleit shabar haduh ba ka umsaw ka la rong ia u, na ka jingheh palat ka um kaba la ktah na ka jingshlei um.
Kumba la ioh lum jingtip, naduh katei ka miet kaba u la hap sha wah la pynlong ia ka jingiawad ia utei u samla bad kim shym la lap satia bad dei haduh mynta ka sngi ba la dap 4 sngi kyntih, ba sa lap ia ka met jong u sharum ka jingkieng Byrnihat ba ka um ka la rong ia ka met jong u.
Ia ka met jong une u samla la lap na katei ka wah, kaba dei na ka jingtrei shitom ka kynhun SRDF ka Assam bad ka kynhun ki Pulit na Sonapur Police Stattion lem bad ka jingdon lang ki nongshong shnong katei ka thain.
Ka tyllong khubor ka iathuh, ba hadien ba la lap ia ka met jong u, la pynlong ia ka jingtohkit bad la leh katkum ki kyndon jong ka ain bad nangta na ka liang ki Pulit ki la aiti noh ia ka met sha kiba haïing hasem jong u ban leh burom ia ka met ba dang sah jong u.
