Shillong, Nailar 29: U Commissioner Secretary ka tnat Bording u Sanjay Goyal hynne ka sngi ula pyntip baka tnat ka dang pynkhreh iaka rukom pynbna paidbah haba iadei bad ka Plan ban ot bording (Load Shedding) haki katto katne ki jaka hapoh ka Jylla.
Ïa kane u Commissioner ula pynshai haba iadei bad ki jingujor bala ioh pdiang baka tnat kam shym la pyntip lypa, lada don kano kano ka jingot bording (Load Shedding) kaba buh jingeh iaki paidbah.
Haba kren shaki lad pathai khubor u Commissioner ula ong ba haduh mynta ka Meghalaya ka dang pahuh ka jingpynmih bording hynrei ula kubur ruh ba kan don ka jingot bording lada ki nongtrei ka MeECL, ki donkam ban maramot ne bujli iaki wire, Transformer bad kiwei kiwei.
U Sanjor Goyal ula ïathuh ba mynta la ar snem tam ka Meghalaya kam sakhi shuh ka jingot bording (Load Shedding) daki kynta kumba ju long haki snem bala leit hynrei ka jingot bording kan don satang lada don ka jingmaramot ne pynbha iaki rukom sam bording.
Ula ong ba ka daw bah ba don ka jingot bording malum mala kadei hi namar ka jingdkut ki Wire namar ka jinghap ki tnad dieng haba shah lynshop haka bor mariang.
“Lada don ka jingot bording daki kynta, ka MeECL ka pyntip lypa sha ki paidbah daka ba pynmih iaki jingpynbna paidbah haki kot khubor bad kiwei kiwei ki rynsan pynbna paidbah hynrei mynta ka tnat bording ka dang pynkhreh ruh sa da kiwei ki lad ban pynbna paidbah lada don ka jingot bording lada don ka jingmaramot ne jingpynbha iaki Line sam bording” la ong u Sanjay.
U Sanjay ula ïathuh ba mynta ka tnat ka dang pynkhreh ban pynbha iaki Mobile Phone jong ki nongpyndonkam bording khnang ban lah ban phah jingpyntip (Message) shaki, lada ka don ka jingot bording.
