Haba sdang ka CAFA Nations Cup 2025 kaba la long hapoh ka ri Tajikistan, ka kynhun ialehkai phutbol ka India, ka la lah ban pynliem noh ia ka Tajikistan da 2-1, ha kaba ia ki kol na bynta ka India, la thep da u Anwar Ali ha ka minit ba 4 bad u Sandesh Jhingan ha ka minit ba 13, katba ia ka shikol na bynta ka Tajikistan, la thep da u Shahrom Samiev ha ka minit 23 jong ka kylla step ka jingiakhun.
Ka jingiakhun ha ka kylla miet, ka la kut noh ha ka jingiakhaid kaba yn don kiba lah ban pynkhihjar, ka Tajikistan ka la ioh ia ka kabu ban pynphai ia ka shikol, kata ba ka la ioh Penalty ha ka minnit ba 72, hynrei ia katei ka Penalty la lah ban kyrda noh da u Gurpreet Singh, u Rangapkol ka India.
Kum ban shu kdew, ba ka India ka dei kaba don ha ka Group-B, kaba la don ka Iran, India Afghanistan bad ka Tajikistan. Hynrei haba phai ha ka FIFA Ranking, ka India ka don ha ka kyrdan ba 133, ka Iran ha ka kyrdan ba 20, ka Tajikistan ha ka kyrdan 106 bad ka Afghanistan ha ka kyrdan ba 161.
Lyngba ka namjop kaba hynnin ka sngi, ba ka India kaba don ha ka kyrdan ba 133 ka la pynliem ia ka Tajikistan ha ka kyrdan ba 106. Ka jingiakhun kaba bud ia ka India kan dei ha ka 1 u Risaw, kata ia ka Iran, ka ri kaba don ha ka kyrdan ba 20 ha ka FIFA Ranking, kaba la rung World Cup la bunsien bad kaba la pynthikna ruh ialadei na bynta ban iakhun ha ka World Cup 2026.
Hadien ka jingiakhun pyrshah ia ka Iran, ka jingiakhun ba bud ka India kan long pyrshah ia ka Afghanistan, ka kynhun ialehkai ba ka Iran ka la thep da 3-1, ha ka sngi sdang jong ka CAFA Nations Cup.
