Nongpoh, Nailar 30: Haba kren ha ka jingialang ban pynbam smai bad ban pynskhem ia ki nongialam ka Khasi Students Union, Northern Border Area mynta ka sngi ha Byrnihat, u Samla Raymond Kharjana, Organizing Secretary ka seng kmie, u la ong, “Ha kano kano ka thma kaba ngi ia khun ban iada ia la ka ri bad ka jaid bynriew, ym pat ju don satia kita kiba jop da kaba pyndonkam tang da u khulom bad ngi hap ruh ban pyndonkam da ka wait bad ka stieh”.
Kane ka jingkren jong u samla Raymon Kharjana kum u nongialam ka seng, ka long ban ai mynsiem ia kitei ki nongialam ba thymmai ka KSU Northern Border Area, ha kaba kum ki shipai ka jaid bynriew, ka thong kaba hakhamt ba ki pyniasoh sha ka KSU, ka dei ban iada ia la ka ri bad ka jaid bynriew. Ha ka jingiaid lynti bun ki ia kynduh jingeh ban iada ia la ki paradoh ki parasnam khamtam ha kitei ki shnong khappud bad ka don ruh ka khep kaba ki hap ban pyndonkam ym tang da u khulom bad ki hap ruh ban pyndonkam da ka wait bad ka stieh ban iada ia la ki paradoh ki parasnam.
U la kyntu jur ruh katba dang don ka por ki dei ban long ki riew ialeh ban iada ia la ka ri bad ka jaid bynriew bad kam myntoi ba kin babe hadien habud lada kim shim ia kata ka jingkitkhlieh ban ban iada ia la ka jaid bynriew naduh mynta ba ki la wan ban pyniasoh sha ka KSU.
U la bynrap ruh ka nongrim ka seng KSU ka long ban shakri bad ban iada ia la ka jaid bynriew la ka dei ban iaid da kano kano ka lynti bad kum ki samla kiba wan ban iasoh sha ka KSU ki dei ban sdang naduh mynta ban rah nam ia ka thong ka KSU bad khamtam ban peitngor ia la ki paradoh ki parasnam.
La sakhi lang ruh ha kane ka sngi ba la pynskhem bad pynbam smai ia kitei ki nongialam da ka jingdon lang u u President ka KSU North Khasi Hills District Unit u Samla Ferdynald Kharkamni, u Samla James Hitler Mawphniang, General Secretary, u Samla Lambok Rymbai, Vice President bad kynthup kiwei kiwei ki nongialam ka sengkmie bad na ka District.
Kitei pat ki nongialam ka KSU Northern Border Area ba la pynskhem bad pynbam smai ki kynthup ia u samla Aloysius Lapang President, u Baiaishah Lapang Vice President, Overson Lyngdoh General Secretary, Johnpaul Sohpdang Assistant General Secretary, Noblestar Lyngdoh Organising Secretary, Maitlynti Klein Assistant Organising Secretary, Rajesh Shakwa Education Secretary, Alex Kharkrang Assistant Education Secretary, Budlang Kharjahrin Finance Secretary, Comingsoon Lyngdoh Publicity & Information Secretary lem bad 17 ngut ki dkhot ka Executive Committee.
