Shillong, Nailur 03: Ka Meghalaya kala shah kynthup haka map jong ka National Medical Comission (NMC) hadien baka Shillong Medical College kala ioh jingbit ban sdang pynlong class noh naduh Nailur 2025.
Kane ka wan hadien ba dangshen ka Shillong Medical College kala ioh jingbit (Permission) naka NMC ban pynrung class noh naka bynta 50 ngut ki samla pule Doctor naduh u bnai Nailur 2025.
Ka Meghalaya kala ioh iaka bhah lane State Quota 85% ki seat naka bynta ki samla pule trai Jylla katba 15% ki seat yn leit shaka National Quota.
Ka Shillong Medical College kaba dei ka Brown Field Medical College kan pynlong class na Shillong Civil Hospital bad na MCH Hospital kaba don ha Lawmali.
Ia kane la pyntip daka Myntri ka tnat ka koit ka khiah ka Kong Ampareen Lyngdoh bad kala iathuh ba kane ka Shillong Medical College kan dei 100% jong ka Sorkar.
Haba kren shaki lad pathai khubor ka Kong Ampareen kala iathuh baka bai pule Doctor hapoh ka Shillong Medical College kan dei T.30 hajar man u snem.
“Ka long kaei kaei kaba sngewtynnad ym tang iaka tnat ka koit ka khiah hynrei ia baroh ki nong shong ka Jylla namar haka sien ba nyngkong ka Meghalaya kan sdang noh iala ka jong ka Medical College jong ka Sorkar ka Shillong Medical College ka ban sdang shim class noh naduh mynta u bnai Nailur 2025” la ong ka Kong Ampareen.
