Nongpoh, Nailur 03: Ba la jur ka jingkhapngiah ha ka leit ka wan ki paidbah bad ia ka jaka pynieng ia ki Kali kamai ne ki kali ki riew shimet hapoh ka sor Nongpoh, ki nongialam Shnong ka Shnong Nongpoh, ki nongialam ka Nongpoh Region Auto Owners and Drivers Association bad ka tnad Traffic na Nongpoh Police station mynta ka sngi ki la pynlong da ka jingiajurip lang ia ki jaka pynieng kali khnang ban nym wan rah ka jingdheng kali ne ka jingkhapngiah ia ki paidbah ba leit ba wan ha kane ka sor Nongpoh.
Ha kane ka jingleit jurip la ia don lang naduh u Rangbah Shnong ka Nongpoh u Bah S. Mynsong, u ophisar na ka tnad Traffic u Bah B. Thangkhiew, u Bah Tony Shylla, Vice President ka Nongpoh Region Auto Owners and Drivers Association lem bad kiwei kiwei ki nongialam.
Ha kane ka jingleit jurip ki la pynbeit kyrpang ia ki jaka pynieng kali ha kylleng ki bynta ka sor Nongpoh bad la leh ruh ia kane khnang ba kan nym wan rah jingeh ia ki paidbah ba leit ba wan lyngba ka surokbah National Highway bad ruh kiba leit iew leit hat , ha kaba bunsien da ka jingieng klumar ki Kali ka wan rah ia ka jingdheng kali bad ka jingjynjar ia ki paidbah ha ka leit ka wan.
Haba kren ruh ha kane ka sngi, naduh u Rangbah Shnong u Bah S. Mynsong, u ophisar ka tnad Traffic u Bah B. Thangkhiew bad u Bah Tony Shylla kum u nongialam ka seng ki nongniah Auto Rickshaw, ki la buh ka jingkyrpad naduh ki trai kali, ki Dribar bad ruh ki paidbah ban ia ai ka jingiatrei lang bad ruh ban kohnguh ia kine ki jingpynbeit ban ieng ia ki kali, khnang ba kane kan nym wan rah jingeh ia ki paidbah hapoh ka sok Nongpoh.
