U Myntri Rangbah ka jylla u Conrad K Sangma hynnin ka sngi u la lum ïaki ophisar ban shimkhia mardor namar ka jinglong jingman jong u surok National Highway-6 haka thaiñ Lumshnong sha Ratachera, namar ka jingkynduh mawsiang jong ki paidbah haka leit ka wan naka jingtwa khyndew bad kumjuh ruh ka jingtuid ka umsaw naka jingther u lapbah bad bun ki kali kila sahkut ha katei ka jaka.
Naka liang u Conrad Sangma u la bthah ruh iaki ophisar ban shimkhia mardor bad ban wad ki lad ki lynti ban shna lynti ïaka jingïaid jong ka um, ba ki paidbah ba leit ba wan kim dei ban shah ktah namar utei u surok u dei uba donkam bha ban ïaid lyngba ka jylla sha kiwei kiwei ki jylla.
Kum ban shu kdew hangne ba naka liang ka Joint Action Committee ba kynthup ïaka shnong Umkiang, Ratacherra, Dona Skur, Dona Umbluh, Pyrtakuna, Kuliang, Borsara, haduh Tongseng ka la shim ïa ka rai ban khang ïa utei u surok khlem buh por naduh ka 19 tarik mynta u bnai naduh Malidor haduh Tongseng kaba hap hapoh ka Elaka Narpuh, East Jaiñtia Hills District ntad haduh ba ka Sorkar lyngba ka NHAI, NHIDCL kan shna pyndep ïa u surok ban maramot ïa ki krem ki kroh ha shilynter u surok NH-6 ha ki thaiñ Namchiang bad kumjuh bad shna ïa ki nala kiba paka.
LUM U CM IAKI OPHISAR NAMAR KA JINGTWA KHYNDEW BAD MAW HA SUROK NH-6
