Bajali, Jylliew 16: Hashwa ka jingrakhe ia ka lehniam Eid-ul-Adha, ki masi ba la wanrah da ki longiing na ka jaidbynriew Muslim na bynta kane ka jinglehniam ki la lait phet noh na kawei ka kali kaba kit kyrpang ia kine ki masi, kane ka jingjia ka la jia ha Baksa District jong ka Assam.
Katkum ka khubor ba la iohlum, u Anwara Hussain, u nongshong shnong ka Dhupguri hapoh Baksa district, u la iathuh, ba u la wanrah ia ki masi na ka bynta ka jinglehniam (Qurbani) kawei na ka jinglehniam jong ka Eid Qurbani ba ju rakhe man u snem da ki jaidbynriew Muslim, hynrei sniewbok pat, ba ki masi kiba la thep bha hapoh kawei ka kali ki la lait phet noh khlem lap dien shuh.
Hadien ka jingbym lah satia ban ioh biang ia kine ki masi ba la lait phet, na ka liang u Anwara Hussain u la pynbna da ka song pisa kaba 5 hajar tyngka ia kino kino ki briew kiba lah ban pynioh biang ia kine ki masi kiba la leit phet.
Lah ban kdew, ba ha u snem 2022, u Myntri Rangbah ka jylla Assam u la pynbna bad kyrpad ia ki paid Muslim kiba shong basah hapoh Assam ba kin kiar na ka jingia bam doh masi ne pyniap dusmon ia ki masi khamtam ha ki jinglehniam jong ki, khamtam ha kito kiba shnong kiba sahlang ruh da kiwei kiwei pat ki jaidbynriew.
Ka sorkar jylla Assam, ka la bthah ruh ia ki Deputy Commissioners bad ki Superintendents of Police ban pyntikna ba kan nym don kano kano ka jingpyniap dusmon ia ki mrad ki mreng khamtam ia ki masi bad ruh ban iatreilang bad ka tnad Animal Welfare Board of India’s SOP ban iada na ka jingpyniap ia ki masi bad ban pynshitom ia kito kiba pynkhein ia kane ka jingbthah da ka sorkar Assam khamtam ha ka jinglehniam Eid-ul-Adha.
