Ka kynhun ki nongñiah auto hapoh ka lama Nongpoh Region Auto Owners and Drivers Association (NRAO&DA) mynta ka sngi ki la pynpaw da ka dak jingsngewsih halor ka jingkhlad noh u Myntri Rangbah barim ka jylla, u Dr. DD Lapang. Ki la wah da ki lama ïong ha ki kali auto bad ha surok bah National Highway ha sor Nongpoh, kum ka dak ka jingburom bad ban pynpaw ruh ïa ka jingsngewlem bad ka jingleh burom ba khatduh mynta ka 15 tarik Nailur kaba dei ruh ka sngi ontep
Kum ka dak ka jingburom ïa u maheh, uba ba don bynta bad kane ka kynhun naduh ki por ba sdang, ki nongñiah auto kim lah khlem ban pynpaw ba ka jingkhlad u Dr. Lapang ka long ka jingduhnong kaba khraw eh ïa ka jylla bad khamtam ïa ka dong Ri-Bhoi baroh kawei. Ha ka jingïalam u President jong ka kynhun, u Bah Banasar Lyngdoh, ryngkat kiwei ki nongïalam bad ki dkhot, ki la leit ban buh syntiew hakhmat u motdur jong u Dr. Lapang ha phyllaw ka Ri-Bhoi College, bad ki la pynlong ruh ka jingduwai kyrpang ba ka mynsiem u Dr Lapang kan shong jahthaid junom.
Haba kren halor kane ka sngi, u Bah Banasar Lyngdoh u la ong ba ka jingkhlad noh u Dr. DD Lapang ka long ka jingduh kaba khraw ïa ka jaitbynriew Khasi, namar u dei u Myntri Rangbah ba khatduh na ka jaitbynriew Khasi uba la bat ïa ka kyrdan kum u Chief Minister haduh san sien kynthih. Hadien jong u, ym don shuh mano mano na ka jaitbynriew Khasi ba la poi haduh kata ka kyrdan.
Kum ka kynhun ki nongñiah auto ka phah ruh ïa ka jingsngewlem sha ka longïing u Dr. Lapang, naduh ka lok, ki khun bad ki ksiew. U pynpaw ba watla ki la duh noh ïa u rishot jong ka longïing, hynrei ki duwai ba u Blei un pyntngen mynsiem bad un ai bor bad jingkyrkhu lang ïaka iing ka sem baroh kawei.
