Nongpoh, Nailur 15: Ka seng HNYF Northern Region kum ka jingbteng ban shakri na ka bynta ki paidbah ha ka them Ri Bhoi, ha ka 13 tarik u Nailur 2025 ka la pynskhem da ki nongialam ba thymmai ka Eastern Circle ha Bhoirymbong, ha kaba u Vice President ka Seng Kmie u Bah Barna Manih u la shim ia ka bynta kum u kongsan ban pynskhem bad ban pynbam smai ia ki Nongialam katei ka Eastern Circle.
Ha katei ka sngi la don ryngkat naduh U President ka HNYF Northern Region u Bah Hesting Lyngdoh, u General Secretary u Bah Alfred Malai, u Finance Secretary u Bah Robin Umbah, u President ka Western Zone u Bah Pynkhraw Makri lem bad kiwei kiwei de ki nongialam.
Ki nongialam ba thymmai ka HNYF Eastern Circle ba la pynskhem bad pynbam smai ki kynthup ia u Bah Apbor Nongrum kum u President, u Bah Micky Shadap kum u General Secretary, u Bah G.S Hahshah, Adviser lem bad kiwei kiwei ki nongialam bad ki dkhot ka HNYF Eastern Circle.
Ha katei ka sngi, la ai jingkren ruh da u Bah Barna Manih ha kaba kum u Vice President ka Seng kmie, u la kyntu ia kite ki nongialam ba kin shim lem ia ka jingkitkhlieh ban peit ban khmih ia ka jingeh ki paidbah ha katei ka thain Eastern Zone ka Ri Bhoi District.
