Nongpoh, Nailur 15: Kum ka jingburom bad ban pynpaw ia ka jingsngewsih halor ka jingduh noh ia u Dr. D.D Lapang kum u Kpa ka Ri Bhoi, ka Dorbar Shnong Nongpoh kaba dei ka Head Quarter jong ka Ri Bhoi District, mynta ka sngi ki la phah khang lut ia baroh ki dukan kiba don ha sor Nongpoh ban ia snoh kti lang bad ruh ban pynpaw ia ka jingsngewsih ha kane ka sngi ba la leh burom khaduh ia ka met u Dr. D. D Lapang ban sa tep don burom noh mynta ka sngi ha u Lum jingtep ka Balang Presbyterian Weiking, Shillong.
Kumba la pynpaw da u Bah Plielad Tiewsoh Assistant Rangbah Shnong ka Nongpoh, la ong ba ka Dorbar Shnong ka la shim ia kane ka rai ban phah khan glut ia ki dukan ha Nongpoh, ka long ka jingburom ia une u nongialam uba la noh synniang shibun eh ia ka Shnong Nongpoh ha ka por ba u dang long kum u MLA bad u Myntri rangbah ka jylla.
U la ong ruh ba kane ka jingkhang ia ki dukan ka sdang naduh ka por 1 baje noh phai sngi haduh ka por 3 baje noh phai sngi, ban burom ia ka jingleh burom ba khatduh ia u Dr. D.D Lapang ha Shillong da ka sorkar bad ka ïing ka sem shwa ban leit buh ia ka met ba dang sah jong u ha u Lum Jingtep.ka Balang Presbyterian Jaiaw ha Shillong.
Ha kane ka sngi, la ia snoh kti lang ruh naduh ki Dribar Sumo, Local Taxi bad ruh ki Dribar Auto Rickshaw kiba la wah da ki lama ïong ban pynpaw ia ka jingsngewsih ba la duh noh ia une u nongialam ba radbah ha ka them Ri Bhoi, la ong u Bah Tiewsoh.
