Nongpoh, Nailur 15: Kum ka dak ban iashimbynta lang ha ka ban leh burom khatduh ia u (L) Dr. D.D Lapang, mynta ka sngi ki Nongialam ka Ri Bhoi Youth Federation (RBYF) jong lai tylli ki Circle, kiba kynthup ia ka Nongpoh circle, 20mer Circle bad Byrnihat circle, ki la pynlong ka jingduwai bad sngap jar ha u mot sahnam jong u (L) Dr. D.D Lapang, uba don ha phyllaw ka Ri Bhoi College.
Ha katei ka sngi, ba ki nongialam ha ryngkat ki dkhot ka RBYF, ki la leit buh syntiew bad ka jingduwai sngap jar ha khmat u durmot sahnam u Dr. D.D Lapang, la sakhi da ka jingdon lang, ki nongialam jong kitei ki Circle, kiba kynthup ia u samla Alberto Nongsiej, President Nongpoh Circle, u samla Seiborlang Ranee, General Secretary 20mer Circle, u Ricky Lapang, President ka Byrnihat circle lem bad kiwei ki dkhot jong kitei ki Circle.
Haba ki kren ha katei ka sngi, kitei ki nongialam RBYF, ki la pynpaw ka jingsngewsih ba ki la duh noh ia u Adviser founder jong ka Ri Bhoi Youth Federation.
Ki la pynpaw ruh ba ka jingkhlad u Dr. D.D Lapang, ka la long ka jingduhnong ym tang ia ka Seng, hynrei ia ka Ri Bhoi bad ia ka jylla hi baroh kawei.
