Nongpoh, Nailur 15: Ka Kyntien u Soso Tham kaba ong, “Kyndit ka tnad ka khien, baroh ki shnong ki smiej bad dei ha u Rangbah kein baroh ki briew ki ieit”. Kane ka kyntien ka la wan paw ha u Dr. D.D Lapang kum u nongialam ba radbah, u MLA barim ka Nongpoh bad u Myntri barim ka jylla, ha kaba mynta sa tang ki jingkynmaw ieit ia ki matti jongu, ba la leh burom khatduh noh mynta ka sngi hadien ka jingkhlad noh jong u ha ka 12 tarik u Nailur 2025 ha ka rta kaba la 96 snem ka jingiaid lynti jong ka jingim.
Haba kren halor une u nongialam, u la bat shisha ia kata ka kyrdan kaba kat u nongialam hapoh ka jylla bad dei namar kane ka daw ym tang ia ka ing ka sem, ki khun ki kti, ka shnong ka thaw kiba la leh burom khatduh ia u, hynrei haba leh burom khatduh ia u mynta ka sngi shwa ban leit ontep sha u Lum jingtep la shim bynta ban leh burom naduh ka Balang, ki kynhun seng bapher bapher bad khamtam ka sorkar jylla kaba hap ban shim ia ka jingkitkhlieh ban leh burom kum ka jingburom halor kata ka kyrdan nongialam kaba u la shakri ban kyntiew ia ka jylla Meghalaya kum Myntri rangbah barim ka jylla.
Ka jingleh niam bad ka jingleh burom khatduh ia ka met ba dang sah jong u Dr. D.D Lapang ka la sdang naduh na la ïing ha Luchumiere Shillong ryngkat ki jingniew tang halor ki matti jong u kum u nongialam bad la bteng ka jingleh burom da ka sorkar ha Madan Student, ha kaba shi sien ong ka la pynhun ia u Dr. D.D Lapang uba la ioh kat kane ka burom wat la um don shuh ha sla jong kane ka pyrthei bad leit shong jahthaid ha ka khet ka jong u Trai.
Ha kane ka jingleh burom da ka sorkar la don bynta naduh u Myntri rangbah duh ka jylla u Conrad K. Sangma, u Symbut Myntri ka sorkar, u Bah Prestone Tynsong, ki myntri sorkar, ki MLA, ki MDC, ki heh ophisar bad jan baroh ki riewheh ki riew hain bad ki nongialam na kylleng ka jylla, ha kaba kene ka sngi kan sa long shisha ka sngi kaba sah jingkynmaw ba ngi hap ban bud ia ki dienjat jong u Dr. D.D Lapang kaba ngim lah ban niew tang halor u synniang u bynhei ba u la synniang sha ka jylla.
Ha kane ka sngi ba la tep don burom ia u Dr. D.D Lapang ym tang ka jingleh burom da ka ing ka sem, ki lok ki jor, ki kha ki man bad ki kynhun bapher bapher ha ryngkat ka sorkar jylla, hynrei la ioh ruh ia ka jingleh niam ba pura da ka Balang Presbyterian Jaiaw kiba la buh jingduwai kyrpang na ka bynta ka jing jahthaid ba bym jut kut jong u Dr. D.D Lapang.
