Shillong, Nailur 16: Hadien ba u Myntri rangbah ka jylla u Conrad K. Sangma u la pynbujli thymmai ia ki 8 ngut ki myntri sorkar ha kane ka sorkar synrop lang ka Meghalaya Democratic Alliance, u Lat ka jylla u C.H Vijayashankar mynta ka sngi u la pynbam ia kitei ki 8 ngut ki myntri sorkar ba thymmai ha ka jingialang kaba la long mynta ka janmiet ha Raj Bhavan, Shillong.
Kitei ki 8 ngut ki myntri sorkar ba la shah pynbam smai ha u Lat ka jylla ki kynthup ia u Bah Sosthenes Sohtun MLA ka Jirang, u Timothy D. Shira MLA ka Resulbelpara, u Bah Wailadmiki Shylla MLA ka Jowai bad u MLA ka Dalu u Brening A. Sangma kiba dei na ka NPP Party.
Na ka UDP party ki MLA ba la shah pynbam smai kum ki Myntri sorkar ki kyntup ia u Bah Metbah Lyngdoh, MLA ka Mairang bad u Bah Lakmen Rymbui, MLA ka Amalarem, na ka BJP u Sanbor Shullai MLA ka South Shillong bad na ka party HSPDP u Methodius Dkhar MLA ka Mawshynrut.
