Ka Australia ka kynhun kaba kham khlain hapoh ka lympung ialehkai T20 World Cup kaba dang jam shaphrang, ka la lah ban pynliem noh ia ka Scotland da 5 wiket ha ka jingiakhun kaba khatduh jong ki Group Stage, bad lyngba kane ka jingjop jong ka Australia, ka la pyntikna ruh ban ailad sa ia ka kynhun jong ka England ban ioh rung sha kawei pat ka thup ba shakhmat kata ka Super 8.
Ha ka jingiakhun hapdeng ka Scotland pyrshah ia ka Australia, ka Scotland ka la buh ia ka thong kaba 181 run ia ka Australia hapoh ki 20 Overs, ha kaba wan pat ban beh ia katei ka thong, ka Australia ka la mad jingeh haba sdang namar hapoh ka 60 run ka la duh noh 3 wiket hapoh ka 9 over hashwa ban wan tied ia ka pali da u Travis Head u ba la kamai marwei 68 run hapoh ki 49 tylli ki bol bad u Marcus Stoinis u la kamai 59 na ki 29 bol bad lyngba ka jinglah ban tied bha kine ki arngut ki rangialehkai kriket ka la ai mynsiem pat ia ka kynhun Australia.
Ka Australia ka dei ka kynhun kaba la pyntikna lypa, ba kan jam sha kawei pat ka thup ha kane ka T20 World Cup namar kane ka kynhun kam shem la rem wat tang shisien ruh naduh bas dang kane ka lympung T20 World Cup.
Kawei pat ka kynhun, jong ka England hadien ka jingjop pyrshah ia ka Namibia lyngba ka DLS method ha ka miet jong ka Sngi Saitjain ka la pyntikna ban rung sha ka Super 8 katba kane ka la buh pat ia ka kynhun Scotland hapdeng ka jingkhuslai namar ka donkam ban jop beit ia ka jingiakhun kaba la long mynta ka sngi.
Ha ka jingiakhun ka Scotland bad Australia, nyngkong ka Scotland ka la kham ioh mynsiem da ka jingialehkai bha hapdeng u Brandon McMullen u la lah ban kamai 60 runs na ki 34 bol, u George Munsey 35 run bad u Kaptain u Richie Berrington 42 run bad ban buh ia ka thong 181 ia ka Australia hapoh ki 20 over.
